Kryeministri Edi Rama ka mbledhur ditën e sotme kabinetin qeveritar në një takim informal në Elbasan. Ky është takimi i parë i qeverisë për vitin 2019-të edhe pse informal. Burime bëjnë me dije se në këtë takim janë të pranishëm ministrat e shkarkuar nga Rama dhe ministrat e sapoemëruar pas Asamblesë Kombëtare socialiste të 28 dhjetorit 2018.
Në fokus të këtij takimi do të jenë sfidat dhe objektivat e këtij viti për qeverinë “Rama” ku jo vetëm është një vit zgjedhor, pasi në 30 qershor do të zhvillohen zgjedhjet vendore, por njëherazi edhe sa i takon procesit të integrimit europian, ku pritet çelja e negociatave pas 6 muajsh.
Nuk mungojnë në këtë takim edhe kryetari i grupit parlamentar të PS, Taulant Balla dhe kryeparlamentari Gramoz Ruçi.
Mbledhja e qeverisë vjen një javë pas ndryshimeve në kabinetin qeveritar. Kryeministri Rama vendosi të ndryshojë 7 ministra dhe të kalojë në postin e zv.kryeministrit, deputetin socialist, Erion Braçe si dhe riktheu Ministrinë për Marrëdhëniet me Parlamentin ku u emërua ministre Elisa Spiropali.
