Në Kuvendin e Shqipërisë pritet të votohet ditën e nesërme buxheti nen për nen i vitit 2025, pasi ka kaluar shqyrtimin dhe diskutimet në të gjitha komisionet parlamentare.
Në seancën që konsiderohet ndër më të rëndësishmet e aktivitetit parlamentar, rikthehet pas gati 1 viti mungese për shkak të arrestit shtëpiak dhe akuzave në dosjen e aferës “Partizani”, Sali Berisha, i cili buxhetin prej 8.2 mld eurosh e ka konsideruar si draftin e vjedhjeve të mëdha.
Berisha një ditë para njoftoi edhe 2 amendamente në buxhet me firmën e tij, teksa paralajmëron rikthim të fuqishëm në Parlament.
“Ju jeni dëshmitarë se si dritarja zëvendësoi parlamentin dhe Edi Rama në fjalimet e tij shprehte vrerin e papërmbajtur ndaj dritares. Kështu që unë kthehem nesër në Parlament në vazhdim të betejës sime gjer në fitore. Kjo është!”, shprehet kryetari i PD ndër të tjera.
Berisha rikthehet në Kuvend pas 11 muajsh mungesë, zbardhen dy amendamentet për buxhetin të kreut të PD
Rikthimi i Sali Berishës u shënjua me depozitimin e 34 amendamenteve të PD-së për buxhetin e vitit të ardhshëm, mes të cilave 2 mbajnë firmën e tij. Por pritet që mazhoranca pritet të refuzojë amendamentet e demokratëve dhe të ngrejë në seancë plenare kartonët e kuq. Gjatë mbledhjes së grupit, amendamentet e Partisë Demokratike janë konsideruar provokim politik nga socialistët, gjë që priret të reflektohet edhe në qëndrimin e tyre në seancë.
E teksa dinamika në Parlament pritet të ndryshojë me rikthimin e Sali Berishës, në rast të ndonjë skenari kaotik dhe moslejimi nga opozita të një seancë normale, do të kalohet direkt në votim.
