Një ngjarje e rëndë ndodhi të hënën në fshatin Mekat të Vlorës ku u shënua një krim i dyfishtë. 39-vjeçari Genci Koreta vrau me armë zjarri xhaxhain e tij, Jorgji Koreta,64 vjeç dhe më pas çiften e ktheu drejt vetes duke humbur jetën si pasojë e plagëve. Familja Koreta ka hapur dyert e mortit këtë të martë. Banorët e fshatit, por edhe të afërm kanë treguar që nipi 39-vjeçar nuk ka pasur probleme me xhaxhain e tij.
“Djali ka qenë i përsosur. Djalë që kur kalonim rrugës thoshte “mirëdita, mirëmbrëma” pinte kafe”, tha një banor.
Një afërme e familjes Koreta ka thënë se askush nuk e beson këtë ngjarje. Ajo ka dëshmuar se nëna e 39-vjeçarit ka qenë duke e pritur në shtëpi, madje i kishte bërë gati edhe ushqimin për ta ngrënë.
“Ka qenë djalë aq i mirë ky Genci. Ishte djalë i mirë, djalë punëtor. Nuk e beson njeri që ka ndodhur që e ka bërë ky djalë. Edhe e ëma, e pyetëm, “unë po e prisja, i kisha bërë pjatën me gjellë, më vjen kunati më thotë, ku e ke djalin se Jorgji nuk ka ikur akoma në Vlorë””, tha ajo.
E afërmja thotë se mes tyre nuk ka pasur probleme me tokën pasi e kishin veç e veç. Megjithatë ajo dëshmon se 39-vjeçari kishte kaluar në depresion pasi kur ishte në Greqi i kishte vdekur djali i xhaxhait, të cilit të hënën i mori jetën.
“Nuk dimë gjë vëlla, ata e morën me vete se kush e ka të drejtën. Djali kaloi një çikë në depresion se këtij, Jorgjit i vdiq djali, edhe ishte në Greqi me djalin ky. U mjekua, dhe ishte mirë, nuk kishte të meta që të vriste xhaxhain”, tha ajo.
Të tjerë banorë, shprehen se djali i Jorgji Koretës humbi jetën në një aksident në punë në Greqi dhe se nuk besojnë që shkak i ngjarjes të jetë kjo.
“Ai u aksidentua në punë, në Greqi. Ata kishin marrëdhënie të mira. Ai vinte tek vëllezërit. Kishte mbjellë ullinj. Ky vinte, punonte, i bënte. Ata i dinë vetë. Pëllëmbë nuk është qëlluar në Mekat. Kjo është ngjarje që na ka rënduar jashtë mase”, tha banori.
Një prej miqve të familjes Koreta tregoi se çfarë i ka thënë i ati i viktimës. Sipas tij, viktimat janë gjetur 3 orë pasi ka ndodhur ngjarja.
“Po nuk dimë gjë, pyeta të atin, ai më tha, në orën 15:00 janë vrarë. Në orën 18:00 kemi gjetur një të shtrirë andej, një këndej tha. Ku e dimë ne se kush ka qëlluar. Vetëm nipi tha i ati që kishte armën në dorë. Ata lajmëruan, xhaxhai i tij dhe kryeplaku. Unë i kam miq, dhe konflikt apo ngatërresë, kurrën e kurrës. Ai qe djalë që i thoshe plaç, ai nuk thoshte ngordhsh. Ai thoshte faleminderit. Djalë i qetë, djalë i urtë”, tha ai.
