Ministri i Drejtësisë Ulsi Manja raportoi sot në Komisionin e Ligjeve lidhur me kompetencat për monitorimin e zbatimit të rekomandimeve të Këshillit të Ministrave kundrejt Prokurorit të Përgjithshëm.
Duke vënë theksin te lufta ndaj korrupsionit, Manja tha se Prokuroria e Përgjithshme për vitin 2021, për cështje që kanë lidhje me korrupsionin, ka hetuar 1792 çështje penale, ka marrë 321 persona nën hetim dhe nga këta 169 persona janë marrë të pandehur.
“Rastet që dërgohen janë të ulta krahasuar me numrin total prej 556 çështjesh të regjistruara. Referuar hetimeve të nisura kryesisht për veprat penale të korrupsionit për 2021 numri i përgjithshëm i çështjeve të referuara 41 541, nga të cilat 125 janë vepra penale të nisura kryesisht nga prokurori ose zënë 0.3 % në numrin e përgjithshëm të çështjeve penale të nisura kryesisht. Vijon të mbetet i ulët roli proaktiv i prokurorit veçanërisht në veprat penale kundër korrupsionit”, tha Manja.
Sipas ministrit të Drejtësisë, rezulton rritje në çështjet penale të regjistruara për veprat penale të pastrimit të parave krahasuar me vitin 2020.
Lidhur me monitorimin për punën nga SPAK, Manja tha se rezulton se “janë hetuar 715 procedime penale nga të cilat 352 procedime janë mbartur nga 2020. 363 procedime janë regjistruar rishtaz nga SPAK si të reja. SPAK ka regjistruar 339 procedime penale në fushën e korrupsionit, ose 50.2% e veprave penale të regjistruara i përkasin grupit të korrupsionit. Shënon rritje nga viti i kaluar me 101 procedime më tepër.
Numrin më të lartë të procedimeve penale e ka neni 258, shkelja e barazisë së pjesëmarrjes në tendera me 90 procedime penale të regjistruara dhe neni 259 korrupsioni pasiv i personave me funksione publike me 83 procedime penale të regjistruara ku ka një ulje me 15 procedime më pak. Vijon të mbetet i ulët roli i prokurorit sa i përket hetimeve proaktive e kryesisht.