Lidhjet e Rusisë me Korenë e Veriut, Iranin dhe Kinën “kërcënojnë paqen” në mbarë botën, ka deklaruar shefi i NATO-s, Mark Rutte.
Në një konferencë shtypi me presidentin francez Emmanuel Macron, Sekretari i Përgjithshëm tha se Rusia po vazhdonte “sulmin e saj kundër Ukrainës”, ndërkohë që “duke u afruar gjithnjë e më shumë me aleatët e saj – Kinën, Iranin dhe Korenë e Veriut”.
“Pas dorëzimit të municioneve dhe raketave, Koreja e Veriut tani ka dërguar trupa për të luftuar dhe për të vdekur përkrah Rusisë në luftën e saj të paligjshme”, tha ai.
“Në këmbim, Rusia i siguron Koresë së Veriut financim dhe teknologji raketore. Kjo është shumë shqetësuese. Këto raketa paraqesin një kërcënim të drejtpërdrejtë për kontinentin e SHBA-së, Evropën, rajonin Indo-Paqësor dhe për Euro-Atlantikun më të gjerë”, tha ai.
Rutte tha se ukrainasit plagosen dhe vriten po ashtu nga dronët Shahed “të siguruar nga Irani”.
“Në të njëjtën kohë Kina mbështet ekonominë e Rusisë dhe mundëson industrinë e saj të mbrojtjes dhe përforcon narrativën e saj në skenën botërore,” shtoi ai.
“Rusia duke punuar së bashku me Korenë e Veriut, Iranin dhe Kinën jo vetëm që kërcënon Evropën, ajo kërcënon paqen dhe sigurinë, po, këtu në Evropë, por edhe në Indo-Paqësor dhe në Amerikën e Veriut”.
Ai vazhdoi duke thënë se mbështetja për Ukrainën duhet të vazhdojë pasi “Ukraina përgatitet të përballet me atë që mund të jetë dimri i tyre më i ashpër që nga viti 2022”.
