Presidenti i Ukrainës ka thënë për Sky News se është “shumë i lumtur” dhe “mirënjohës” që Gjermania ka vendosur të furnizojë me 14 tanke Leopard 2, por paralajmëroi se sasia dhe koha e dorëzimit të automjeteve është “kritike”.
Duke folur në një intervistë me Kay Burley, Volodymyr Zelenskyy falënderoi aleatët në mbarë botën për mbështetjen e tyre të vazhdueshme pas pushtimit rus të vendit të tij.
“Unë do të doja të falënderoja Gjermaninë, Britaninë dhe Shtetet e Bashkuara që morën këtë vendim”, tha ai.
“Në përgjithësi, unë jam shumë mirënjohës ndaj botës për mbështetjen për Ukrainën. Por, duke folur sinqerisht, numri i tankeve dhe koha e dorëzimit në Ukrainë është kritike.”
Vërejtjet e Presidentit Zelenskyy vijnë pasi Gjermania konfirmoi se do të dërgonte tanket Leopard 2 në Kiev dhe autorizoi vendet partnere për t’i dërguar ato – pavarësisht kërcënimeve nga Rusia.
Lëvizja do të thotë se vendet e tjera – si Polonia dhe Spanja – të cilat kanë rezerva të tankeve të standardeve të NATO-s, tani mund të furnizojnë Kievin.
Dje, Moska paralajmëroi Berlinin se dërgimi i tankeve “nuk është shenjë e mirë për marrëdhëniet e ardhshme” – dhe i tha SHBA-së se nëse autorizon një veprim të tillë, do të ishte një “provokim i hapur”.
Ambasada ruse në Berlin e dënoi veprimin si një “vendim jashtëzakonisht të rrezikshëm” dhe një “përshkallëzim” të konfliktit.
