Koronavirusi po përhapet më shpejt tani sesa gjatë valës së parë të pandemisë në pranverë, tha sot këshilltari shkencor i qeverisë franceze, Arno Fontane, duke bërë kështu një nga paralajmërimet më të forta deri tani për rikthimin e Covid-19 në Evropë.
“Virusi po qarkullon më shpejt. Ringjallja e pandemisë filloi në gusht, “tha epidemiologu Fontane, duke shtuar se lufta kundër sëmundjes do të jetë një “maratonë “.
Deklaratat e Fontane vijnë vetmë një ditë pasi autoritetet në Francë njoftuan një rast rekord ditor të koronavirusit, me 41,622 raste të reja pozotive, duke e çuar numrin e përgjithshëm të infeksioneve në vend në 999,043. Franca pritet të tejkalojë një milion raste sot dhe të bëhet vendi i dytë pas Spanjës që arrin atë numër.
Autoritetet franceze tashmë kanë rritur kufizimet për të frenuar përhapjen e pandemisë, duke njoftuar të enjten shtrirjen e shtetrrethimit, i cili fillimisht preku nëntë qytete, përfshirë Parisin. Tani prek më shumë se dy të tretat e popullsisë së vendit.
Fontane vlerësoi se autoritetet franceze kishin arritur të kontrollonin koronavirusin deri në fund të qershorit, duke vënë në dukje se numri i pacientëve Covid-19 mbeti i ulët deri në fund të gushtit, gjë që u dha qytetarëve një ndjenjë false të sigurisë, pavarësisht nga fakti se numri i rasteve tashmë kishte filluar të rritet.
“Kishim një javë të ftohtë në shtator dhe të gjithë treguesit shkuan në drejtimin e gabuar në të gjithë Evropën. Virusi përhapet më lehtë në të ftohtë, sepse ne kalojmë më shumë kohë në ambiente të mbyllura”, shpjegoi epidemiologu.
Pandemia pasi arriti kulmin e saj me 32,292 pacientë në spitale në 14 prill në mes një bllokimi në Francë, ra në nivelin më të ulët në 29 gusht, me 4,530 pacientë. Por në katër ditët e fundit numri i pacientëve është rritur me më shumë se 700 në ditë dhe tani qëndron në 14,032, një nivel që nuk ishte vërejtur që nga fillimi i qershorit.
“Spitalet dhe personeli mjekësor po përballen me një situatë të njohur”, tha Fontane, duke iu referuar kulmit të shtrimeve në spital në fund të marsit dhe në fillim të prillit, kur sistemi shëndetësor i Francës ishte në prag të kolapsit.
“Ne kemi shumë mjete për të mbrojtur veten nga virusi, por po përballemi me një periudhë të vështirë,” tha ai, duke iu referuar kryeministrit francez Jean-Castex, i cili foli për “një nëntor të vështirë” kur prezantoi masat e reja kufizuese.
Ashtu si mjekët e tjerë, Fontane vuri në dukje se duhen dy javë që të funksionojnë masat kufizuese.
