Vazhdon me optimizëm gara për gjetjen e një vaksine kundër pandemisë së re që ka shpërthyer në botë. Një kompani amerikane tregon se ka gjetur një mënyrë për të rritur imunitetin e njeriut ndaj sëmundjes, dhe për këtë do nisë testimet muajin e ardhshëm.
Një tjetër kompani amerikane ka identifikuar një vaksinë të re kundër koronavirusit, dhe pritet të nisë testimet te njerëzit në mesin e muajit maj.
Firma “Novavax” me seli në shtetin lindor të Merilendit njoftoi se produkti i tyre nxit shtimin e antitrupave dhe ofron mbrojtje më të gjatë nga infeksionet virale dhe bakteriale.
“Prova e vaksinës duhet të na marrë ndoshta dy muaj, që do të thotë imunizimi i kandidatëve, marrja e gjakut dhe testimi i reagimit imunitar. Në korrik do kemi një ide se sa reagojnë antitrupat me të cilët i kemi pajisur pacientët, dhe dozën e saktë,” shpjegon shkencëtari i firmës, Gregori Glen.
Kompania amerikane i shtohet dhjetëra prodhuesve të tjerë të medikamenteve që po punojnë për gjetjen e vaksinës kundër koronavirusit, që deri tani ka infektuar mbi 1,5 milionë veta nëpër botë.
Ekspertët vlerësojnë se aprovimi i një vaksine finale mund të marrë të paktën një vit kohë, dhe objektivi për momentin është kontrolli i pandemisë.
“Ne na shqetëson vala e dytë e pandemisë. Nuk ka gjasë që në këtë fazë të parë të kemi një vaksinë që ta adresojë infeksionin. Problemi është se sëmundja do të kthehet, dhe situata do të jetë po njësoj ose më keq,” shprehet doktor Glen.
Muajin e kaluar, ilaçet eksperimentale kundër koronavirusit u testuan për herë të parë te njerëzit nga një tjetër kompani amerikane, e njohur për zhvillimin e medikamentit kryesor kundër hepatitit C por edhe për studimin e ilaçeve kundër HIV-it.
Rezultatet pritet të dalin muajin e ardhshëm, ndërsa interes ka edhe për analizat rreth ilaçit kundër malaries, hidroksiklorokinës, që vazhdon të përdoret te pacientët me Covid-19 edhe pse efikasiteti i saj është i paqartë.