Numri i lejeve të qëndrimit të dhëna për të huajt nga vendet e Bashkimit Evropian në vitin 2016 ka qenë 3.4 milionë ose 735 000 më i lartë se më 2015. Megjithatë, qytetarët nga Shqipëria nuk figurojnë në top-listën e 10 vendeve kryesore të përfituesve. Këtë tregon raporti i publikuar i Eurostat-it, zyrës së statistikave të BE-së.
Përqindja e ulët e pranimit tregon se vijnë më pak azilkërkues. Po kwshtu, si kusht i liberalizimit të vizave, pjesa më e madhe refuzohen nga zyrat e emigracionit, kurse të tjerë, në situatë të parregullt dhe pa mundësi legalizimi, kthehen vullnetarisht në atdhe. Listën e vendeve nga janë pranuar më shumë shtetas për vitin e kaluar e kryesojnë Ukraina, Siria, SHBA, Brazili, India, Kina, Maroku, Turqia, Rusia etj. Motivet për të cilat janë dhënë lejet e qëndrimit kanë qenë të ndryshme e që dallojnë nga njëri vend i BE-së në tjetrin, nga njëri nacionalitet në tjetrin.
Për shembull, ukraninasit kanë fituar të drejtë qëndrimi, kryesisht në Poloni, për nevoja punësimi (82.7%). Kinezët (66.9%), qytetarët amerikanë (46.5%), kryesisht në Angli, dhe brazilianët (41.6%) janë pranuar për arsye që lidhen me arsimimin, ndërsa nga bashkimi familjar kanë përfituar më shumë marokenët (69.8%) dhe turqit (41.2%). Rreth 30% e numrit të përgjithshëm të shtetasve të huaj kanë fituar leje qëndrimi për arsye humanitare, pra të mbrojtjes ndërkombëtare për shkak të konflikteve në vendet e tyre, siç është rasti i sirianëve etj.
Ndër vendet pritëse, ato që kanë pranuar më shumë shtetas të huaj për 2016-n, sipas Eurostat-it, janë Anglia, Polonia dhe Gjermania, të ndjekura nga Franca, Italia, Spanja dhe Suedia. Dy vendet fqinje, Greqia dhe Italia kanë dhënë numrin më të madh të lejeve të qëndrimit për shqiptarët për periudhën në fjalë. Greqia ka pranuar 30958 persona ose 70.2% të numrit të përgjithshëm të shtetasve të huaj, kurse Italia 17167 ose 7.7% të atyre që janë legalizuar në këtë vend. Numri i shqiptarëve që kanë fituar leje qëndrimi në vendet e tjera të BE-së është shumë i vogël, gati i papërfillshëm në krahasim me shtetasit e huaj të top-listës.
