Ministri i Jashtëm serb, Ivica Daçiç tha sot në Beograd se nuk është risi çështja e një marrëveshjeje juridikisht obligative për normalizimin e marrëdhënieve me Kosovën, sepse ajo është iniciuar gjatë hapjes së negociatave për anëtarësimin e Serbisë në BE.
Daçiç ka thënë se është e qartë se ekziston një dallim i madh në mes të kuptuarit të Prishtinës dhe qëndrimit të Bashkimit Evropian në lidhje me atë që duhet të përmbajë ajo kornizë juridikisht obligative dhe se BE-ja nuk mund të ketë një qëndrim të ndryshëm përveç neutralitetit statusor, sepse pesë vendet e BE-së nuk e kanë njohur Kosovën, shkruan Politika, raporton tg.
“A e dini se kur këto vende do të japin pëlqimin e tyre për njohjen e pavarësisë së Kosovës në mënyrë që Serbia të bëhet anëtare e BE-së? Kurrë! Por, le të mos kthehemi tani në ato vende, të luftojmë ne deri në fund”, tha Daçiç, pas bisedimeve me kryeministrin e Guinea-Bissau, Umar Sisoko Embal.
Ministri i Jashtëm serb tha se “pak kush e di se çfarë duhet të jetë përmbajtja e marrëveshjes juridike obligative dhe me siguri do të ketë presion në lidhje me pavarësinë e Kosovës”.
“Pozicioni ynë është parimor dhe i qartë dhe ne nuk kemi ndërmend ta ndryshojmë atë. Ne jemi të hapur për dialog, por nuk pranojmë veprime të njëanshme”, tha Daçiç. Ai përsëriti se Serbia nuk do ta njohë Kosovën.
