DPA/ – Kroacia ka shprehur sot irritimin e saj lidhur me një vendim të gjykatës së OKB-së për krimet e luftës (ICTY), që lidhte një spastrim etnik gjatë luftës së Bosnjes me lidershipin kroat të kohës, çka provokoi një vetëvrasje në sallën e gjyqit.
Ish-kreu ushtarak kroatëve të Bosnjes, Slobodan Praljak, i akuzuar për krime lufte, u vetëhelmua dje në sallën e gjyqit, disa sekonda pasi gjykatësit e Hagës konfirmuan vendimin për ta dënuar atë me 20 vite burg.
Ai u dënua së bashku me pesë drejtues të tjerë lokalë lidhur me një fushatë terroriste kundër boshnjakëve myslimanë në Bosnjen Perëndimore, që Gjykata Ndërkombëtare Penale për ish-Jugosllavinë (ICTY) tha se ishte planifikuar dhe kryer në bashkëpunim me udhëheqësit kroatë të kohës.
Filmimet në sallën e gjyqit shfaqin të akuzuarin Praljak, i cili thërret me zë të lartë se nuk ishte kriminel dhe pastaj aktin e vetëhelmimit.
Kryeministri konservator kroat, Andrej Plenkoviç e përshkroi vetëvrasjen e Praljak si “një akt i një padrejtësie të thellë morale” dhe se ”vendimi i gjykatës së OKB-së ishte i papranueshëm”.
Presidentja kroate, Kolinda Grabar-Kitaroviç refuzoi të merrte pjesë në samitin e lidereve në Islandë, ndërsa parlamenti pezulloi seancën e radhës pas ngjarjeve në Gjykatën e Hagës.
Gjithashtu, media kroate kritikoi ICTY-në lidhur me vendimin e marrë pas më shumë se dy dekadash hetimesh.
“Ky është një fund i trishtueshëm. Gjykata e Hagës ka dështuar në gjithçka ndryshe nga sa pritej”, sipas së përditshmes kroate “24Sata”.
“Çështja u shndërrua në një instrument politik që së bashku me standardet e saj ligjore, ka kontribuar gjerësisht në krijimin e shoqërive të sëmura në rajon dhe largimin e personave normalë”, sipas një komenti të gazetës së sipërcituar.