Mijëra venezuelianë të dëshpëruar po përpiqen të hyjnë në Kolumbi në një përpjekje për t’i shpëtuar urisë dhe shkallës së krimit të shkaktuar nga kriza ekonomike në vend.
Imazhet e publikuara në media tregojnë eksodin masiv të refugjatëve që kalojnë urën ndërkombëtare “Simon Bolivar”, duke u përpjekur t’i shpëtojnë krizës politike që kërcënon të përfshijë Venezuelën.
Venezuelianët hyjnë çdo ditë në Kolumbi për të gjetur punë, por edhe për të bërë blerje. Por vendimi i Presidentit të Kolumbisë për të forcuar masat e kontrolleve në kufij ka rritur frikën tek venezuelianët se për ta do të bëhet më e vështirë për të hyrë në territorin kolumbian.
Venezuela ka një nga nivelet më të larta të vrasjeve në botë dhe sulme të tilla po nxisin edhe rritjen e çmimit të ushqimeve dhe të transportit. Kjo i bën banorët vendas që të kërkojnë punë në Kolumbinë fqinje, e cila gjithashtu nuk shquhet si një vend i qetë, për shkak të nivelit të lartë të trafiqeve të lëndëve narkotike.
Ndërkohë edhe autoritetet në Brazil janë shprehur të shqetësuar për numrin e madh të refugjatëve venezuelianë në vend. Presidenti i Venezuelës, Nicolas Maduro, që ka drejtuar vendin që prej vitit 2013 dhe që tashmë kandidon për një mandat të dytë, ka fajësuar Shtetet e Bashkuara për krizën ekonomike me të cilën përballet vendi i tij.
