Ministri i Jashtëm Ditmir Bushati gjatë konferencës për 60-vjetorin e Shqipërisë në UNESCO kërkoi që Ballkani t’i rikthehet dialogut dhe të shmangë konfliktet.
Ai tha se gjuha e urrejtjes dhe përçarjes, presioni ndaj multilateralizmit dhe tendencat për tkurrje nacionale duhen marrë si sinjale për të qenë më vigjilentë, kërkues e bashkëpunues.
“Angazhimi, vullneti, aftësitë dhe shkathtësitë e brezit të ri do të jenë vendimtarë si për Shqipërinë dhe rrugëtimin tonë evropian, por, edhe për të ndërtuar një rajon që jeton më së fundmi në paqe dhe prosperitet”, u shpreh Bushati.
Ministri i Jashtëm këmbënguli për anëtarësimin e Kosovës në organizatat ndërkombëtare, duke thënë: Kemi mbështetur dhe do të vijojmë të mbështesim pranimin e Kosovës në organizatat ndërkombëtare, përfshirë në UNESCO, si një investim i njëmendtë për qytetarët e Kosovës, por edhe për forcimin e bashkëpunimin rajonal.
Bushati bëri të ditur se vitin e ardhshëm pritet t’i bashkohet Trashëgimisë Botërore edhe Liqeni i Ohrit.
.
