Kosova ka pranuar ditën e mërkurë kontejnerët “me mijëra dronë” luftarak kamikazë, Skydagger, ka njoftuar kryeministri në detyrë, Albin Kurti.
Kurti ndërkaq, ka thënë në rrjetin social “Facebook” se dronët kanë mbërritur para afatit kohor dhe se dhjetëra ushtarakë të Forcës së Sigurisë së Kosovës, tashmë janë të trajnuar për përdorimin e tyre.
Kryeministri i Kosovës ka rikujtuar se shteti i Kosovës ka nënshkruar një kontrat në dhjetor të vitit të kaluar me kompaninë e mirënjohur turke, Baykar.
“Dronët Skydagger ishte planifikuar të mbërrijnë në janar 2026, por i morëm tre muaj më herët”, tha ai.
“Këta dronë kamikazë të njohur edhe si FpV të tipit RTF (Ready to Fly) Skydagger të prokuruar nga ne janë dronë luftarakë të pajisur me mjete shpërthyese me qëllim goditjen e objektivave lëvizëse dhe statike të armikut”, shkruar më tej Kurti.
Sa i përket Skydagger RTF, bëhet fjalë për dron të gatshëm për fluturim, shpesh të cilësuar luftarak, të pajisur me një mjet shpërthyes për përdorim kundër shënjestrave të palëvizshme dhe të lëvizshme.
Megjithatë, ka dhe aplikime profesionale si vëzhgimi dhe kërkim-shpëtimi.
RTF nënkupton se droni është plotësisht i montuar dhe përfshin të gjitha komponentët e nevojshëm, si vetë droni, një transmetues radioje, një marrës dhe bateritë, duke e bërë atë të gatshëm menjëherë për fluturim sapo të blihet.
Ky dron mund të fluturojë me një shpejtësi maksimale prej 130kmh në largësi maksimale deri në 10 kilometra.
Forca e Sigurisë së Kosovës, aktualisht, është në proces të transformimit në ushtri.
Ky proces filloi në vitin 2018, pas miratimit të ndryshimeve ligjore, dhe pritet të zgjasë dhjetë vjet.
