Presidenti turk Rexhep Tajip Erdogan zbuloi të mërkurën një paketë masash ndaj efekteve negative të koronavirusit të quajtur “Mburoja e Stabilitetit Ekonomik”, e cila siguron 100 miliardë lira turke (15.4 miliardë dollarë) për të zvogëluar këto efekte.
Në një konferencë shtypi, Erdogan kujtoi rrezikun e përhapjes së koronavirusit në të gjithë botën, duke kujtuar gjithashtu se si Turqia është një vend që ka ndërmarrë me kohë veprimet kundër përhapjes së tij.
Ai përsëriti rëndësinë e ndjekjes së të gjitha udhëzimeve dhe masave që janë marrë, duke u bërë thirrje qytetarëve turq që të mos dalin nga shtëpitë e tyre dhe të shmangin kontaktet derisa të pushojë kërcënimi i COVID-19.
Erdogan tha se kjo nuk është koha për shëtitje.
“Eshtë koha për të bërë gjithçka që mundemi nga shtëpia, për të minimizuar kontaktin me botën e jashtme. Eshtë koha për të bërë çdo përpjekje në këtë front, si për hir të të dashurve tanë dhe për të gjithë shoqërinë,” tha Erdogan, duke shtuar: “Ne po hyjmë në një epokë të re ku ka të ngjarë të ndodhin ndryshime rrënjësore në rendin global ekonomik, politik dhe shoqëror.”
Presidenti turk tha gjithashtu se dhe vendi i tij është angazhuar në punën shkencore për gjetjen e ilaçit kundër koronavirusit.
“Ne vazhdojmë të punojmë me shpejtësi të plotë për të patur një vaksinë kundër COVID-19,” tha Erdogan.
