Pula është mishi i zgjedhur në Mbretërinë e Bashkuar për tryezën e darkës, por konsumatorët mund të kenë vënë re se shifrat po rriten në faturat e tyre.
Me rritjen e kostos së ushqimit të pulave, energjisë dhe transportit, zinxhirët e ushqimit të shpejtë si Nando’s dhe KFC tashmë kanë ngritur disa çmime, shkruan BBC.
Kjo është pjesërisht për shkak të luftës në Ukrainë.
Pularitë në Mbretërinë e Bashkuar janë nën presion pasi kostot për ushqimin, energjinë elektrike dhe ngrohjen për periudhën e inkubacionit të zogjve janë rritur dhe ato po kalohen në ferma.
Disa prej kasolleve kanë edhe kontejnerë gazi GLN për ngrohje. Çmimet për karburantin tani arrijnë në 40 p për litër, nga 15 p dy vjet më parë – nxitur nga pushtimi rus i Ukrainës dhe shqetësimet për ndikimin që mund të ketë konflikti në furnizimet nga një prej eksportuesve më të mëdhenj të gazit në botë.
Ushqimi i pulave shpesh përbëhet nga gruri ose soja, të cilat kanë parë rritje të çmimeve për shkak të korrjeve të dështuara verën e kaluar dhe konfliktit në Ukrainë.
“Rusia dhe Ukraina janë përgjegjëse për një të katërtën e grurit të eksportuar në mbarë botën”, tha Kynan Massey, drejtor menaxhues i firmës së ushqimit Massey Bros.
“Nëse konflikti vazhdon, ne mund të shohim që çmimet të vazhdojnë të rriten, dhe në Evropë moti i thatë po ndikon gjithashtu në kosto.”
