Shqipëria, e pozicionuar në krah të aleatëve, mbështet sovranitetin territorial të Ukrainës, si dhe nxit dialogun dhe rrugën paqësore për zgjidhjen e konfliktit me Rusinë.
Por Presidenti i Republikës, Ilir Meta, apelon se në çdo rast duhet të garantohen rezervat e shtetit dhe të evakuohen shqiptarët nga Ukraina. Në funksion të kësaj çështjeje, Presidenti i Republikës, Ilir Meta, mblodhi dje Këshillin e Sigurisë Kombëtare për zhvillimet në Ukrainë.
Për afro një orë, mes kreut të shtetit dhe krerëve të institucioneve përgjegjëse për sigurinë u diskutua rreth zhvillimeve më të fundit në kufirin Ukrainë-Rusi, si dhe rreth pasojave të një përshkallëzimi të mëtejshëm nga një agresion i mundshëm ndaj sovranitetit dhe integritetit territorial të Ukrainës.
Presidenti Meta theksoi në mënyrë të veçantë domosdoshmërinë e evidentimit dhe mbajtjes së kontakteve me qytetarët shqiptarë me banim të përkohshëm në Ukrainë dhe mundësimin e evakuimit të tyre në rast nevoje, vijimin e reformave në fushën e sigurisë dhe mbrojtjes, forcimin e kapaciteteve kundër sulmeve kibernetike, marrjen e masave për rritjen e sigurisë së infrastrukturës strategjike dhe garantimin e rezervave të shtetit për çdo rast, si dhe ndjekjen me vëmendje maksimale të zhvillimeve në rajonin tonë.
Presidenti Meta dhe anëtarët e Këshillit të Sigurisë Kombëtare konfirmuan se Shqipëria, edhe si vend anëtar i NATO-s dhe anëtar jo i përhershëm i Këshillit të Sigurimit të Kombeve të Bashkuara, është në krah të Ukrainës, në mbrojtje të sovranitetit dhe integritetit territorial të saj, si dhe nxit dialogun dhe rrugën paqësore për zgjidhjen e krizës aktuale.
Në mbledhjen e djeshme të Këshillit të Sigurisë nuk ishte i pranishëm Kryeministri Edi Rama dhe ministrja e Jashtme, Olta Xhaçka, të cilët ndodhen në SHBA, ku do të marrin pjesë në Këshillin e Sigurisë së OKBsë.
Në vend të kreut të qeverisë ishte zv.kryeministri Arben Ahmetaj. Pjesëmarrës ishin edhe shefi i shtabit, Bajram Begaj, shefi i SHISH, Helindon Bendo, ministri i Mbrojtjes, Niko Peleshi, ministri i Brendshëm, Bledi Çuçi dhe drejtori i Policisë, Gledis Nano.
Sipas informacioneve të inteligjencës amerikane, ka shumë gjasa që këtë javë Rusia të pushtojë Ukrainën. Por Moska, e cila ka grumbulluar më shumë se 100,000 trupa pranë kufirit rus me Ukrainën, ka mohuar çdo plan për të pushtuar dhe ka akuzuar Shtetet e Bashkuara dhe aleatët e saj për histeri.
