Gjykata e Apelit për Krimet e Rënda ka pranuar kërkesën e Prokurorisë për të rikthyer në burg Dashamir Xhikën, ish-kreun e Autoritetit Rrugor Shqiptar, i cili akuzohet për megaskandalin e korrupsionit me rrugën Tiranë-Elbasan. Kujtojmë se në fillim të verës, shkalla e parë kishte caktuar masën e sigurisë “arrest shtëpie” për Xhikën, i cili pretendon se ka probleme me shëndetin. Mirëpo, Prokuroria e Krimeve të Rënda iu drejtua menjëherë Apelit të Krimeve të Rënda, duke kërkuar rikthimin në qeli të Dashamir Xhikës. Treshja e Krimeve të Rënda, pranoi ditën e djeshme kërkesën e Prokurorisë për rikthimin në burg të Xhikës.
Xhika është person nën hetim i dyshuar për konsumim të veprave penale të ‘Korrupsion pasiv i funksionarëve të lartë shtetërorë’ dhe ‘Shpërdorim detyre’ të parashikuara nga nenet 260 dhe 248 të Kodit Penal”, shkruan një njoftim zyrtar i Policisë së Tiranës. Më 26 qershor, Gjykata e Krimeve të Rënda vendosi që të lirojë nga burgu ish-kreun e ARRSH-së, Dashamir Xhikën. Ky i fundit mbahej prej muajsh në burg për skandalin e abuzimeve me rrugën “TiranëElbasan”. Kështu, gjyqtarja e Krimeve të Rënda, Ilirjana Olldashi vendosi që të ndryshonte masën për Xhikën nga “arrest me burg” në “arrest shtëpie”. Mbrojtja pati argumentuar se Xhika kishte probleme me shëndetin dhe nuk përbënte rrezik për shoqërinë, nuk rrezikonte të largohen apo të përsërisë të njëjtën vepër penale për të cilën po hetohet. Ndërkohë, hetimet për rastin vazhdojnë nga Prokuroria e Krimeve të Rënda.
HETIMET
Dëmi i vlerësuar nga Prokuroria e Krimeve të Rënda për abuzimet me ndërtimin e rrugës Tiranë-Elbasan ku nën akuzë janë edhe Albens Alite dhe Aksel Qurduka veç Xhikës, kap shifrën e 37 milionë dollarëve. Këto para janë përfituar në mënyrë të paligjshme nga këta persona dhe të tjerë që janë nën hetim. Tre ish-zyrtarët kanë bërë disa amendime të kontratave për ndërtimin e rrugëve, duke sjellë shtyrjen e afateve të tyre dhe për pasojë edhe dëme. Gjithashtu, Prokuroria evidenton si një shkelje të rëndë, edhe kryerjen e punimeve nga firmat e ndryshme, duke mos pasur më parë një burim financiar. Kjo shkelje është bërë me urdhër të drejtpërdrejtë të Dashamir Xhikës, ku në një moment të dytë, është bërë likuidimi i firmave për punime të kryera më parë. Ligji e ka të përcaktuar qartë se punimet kryhen pas lëvrimit të fondeve dhe jo para tyre. Prokuroria thotë se Xhika ka shmangur edhe Bordin Drejtues të Autoritetit Rrugor Shqiptar. Një tjetër shkelje është edhe situata e krijuar pas rrëshqitjeve të dherave në vitin 2014. Për këtë situatë, ka pasur vonesa në vendimmarrje për zgjidhjen teknike të problematikës nga Këshilli Teknik i ARRSH-së. Por, pavarësisht këtyre shkeljeve të konstatuara, si nga auditi i Ministrisë së Energjetikës dhe Infrastrukturës, ashtu edhe nga Prokuroria e Krimeve të Rënda, dy prej ish-zyrtarëve, Qurduka dhe Alite, i kanë mohuar akuzat në seancën e marrjes në pyetje. Tashmë mbetet që të merret në pyetje edhe Xhika, që po hetohet edhe në Elbasan, për një tjetër abuzim me rrugët.
