Ministria e Infrastrukturës thotë se jahti i miliarderit rus Roman Abramovich, nuk ka ndaluar në ujërat territoriale të Shqipërisë, ashtu si kanë raportuar sot disa media, por është nisur nga Mali i Zi dhe aktualisht ndodhet në ujërat ndërkombëtare mes vendit tonë dhe Italisë.
Ministria e Infrastrukturës dhe Energjisë – Tiranë, 15.03.2022
Lidhur me lajmin e publikuar sot në media, për hyrjen në ujërat territorialë të Republikës së Shqipërisë, të një mjeti lundrues në pronësi të shtetasit rus, Roman Abramovich, Ministria e Infrastrukturës dhe Energjisë sqaron se:
Nga verifikimet e kryera në sistemet e monitorimit të trafikut detar “Marine Traffic”, rezulton se mjeti lundrues “Solaris” është nisur nga Porti turistik Marina Montenegro në Tivat, Mali i Zi dhe po lëviz për në jug drejt Detit Mesdhe.
Mjeti lundrues i mësipërm, aktualisht është duke lundruar në ujërat ndërkombëtare, midis Italisë dhe Shqipërisë, në drejtim të Jugut dhe nuk ka ndaluar apo hyrë në ujërat territoriale të Republikës së Shqipërisë.
