Ish-kreu i Këshillit të Qarkut Lezhë, Bardh Rica dhe ish-drejtori i Urbanistikës së këtij institucioni, Nik Sokoli, u liruan nga akuzat e falsifikimit të dokumentave dhe ndërtimit të paligjshëm. Gjykata e Lezhës ndërkohë shpalli të pafajshëm biznesmenin Agustin Uldedaj, për të njëjtat akuza. Në vendimin e firmosur nga gjyqtari Artan Hajredinaj, sendet e sekuestruara në 2018-ën, iu kthyen personave dhe institucioneve që u përkasin.
Gjyqtari Hajredinaj rrëzoi kërkesën për dënimin me kusht të Uldedajt, Ricës dhe Sokolit, bërë nga prokurori Arben Agovi vetëm pak kohë para se të transferohej në Prokurorinë e Tiranës. Agovi, po ashtu, kishte kërkuar edhe konfiskimin e dy palleteve pesë dhe shtatë katësh në zonën turistike të Kunës në Shëngjin, që sipas organit të akuzës ishin me leje ndërtimi të falsifikuar. Pas shqyrtimit të çështjes në themel që zgjati për rreth 1 vit, Gjykata e Lezhës doli në konkluzionin se nuk ka element te veprës penale. Hetimet në lidhje me rastin nisën në vitin 2018 dhe sipas dosjes hetimore u arrit të provohet se këto objekte kanë leje ndërtimi të falsifikuar dhe në kundërshtim me ligjin.
Me vendimin Nr. 127 datë 13.04.2018 të Gjykatës së Rrethit Gjyqësor Lezhë u vendos masa e sigurimit pasuror “sekuestro preventive” për këta objekte të cilat në atë kohë ishin në ndërtim. Vendimi i Shkallës së Parë u prish nga Gjykata e Apelit Shkodër, duke i hapur rrugë ndërtimit të tyre.
