Tërmeti i frikshëm i 26 nëntorit la 51 viktima, ku dy prej tyre ishin anëtarët e familjes së Bujar Cukës.
Gruaja e tij, Fatmira dhe djali, Sardi u gjetën të vdekur nën rrënoja të përqafuar, ndërsa Bujari dhe vajza e tij, Egi, e cila ndodhej në Tiranë të gjyshërit, arritën të shpëtonin nga tmerri.
Për ‘News 24’, Bujari ka treguar tmerrin e përjetuar gjatë tërmetit dhe se si shtëpia e tij u shemb, duke zënë nën rrënoja gruan dhe djalin e tij.
Mes lotësh, ai ka rrëfyer se u shemb korridori në momentin e tërmetit dhe nuk arrinte dot të shihte djalin.
Më tutje, Bujari thotë se është i shkatërruar dhe nuk ka forcë të flasë, por e vetmja dëshirë e tij është që t’i kujtojë gruan edhe djalin gjithnjë të lumtur.
Ai tha për “News 24” se:
Unë jam Bujar Cuka , ra tërmeti i parë dhe gruaja qëndroi me djalin. Ne ishim zgjuar më pas, kam hapur televizorin tek Neës 24, pamë tërmetin e parë që ka rënë, e fika televizorin ika nga dhoma, u ula në krevat mora telefonin mbështetur, atje ra tërmeti i fuqishëm. Hapa derën, ra paneli zuri gruan, djalin nuk e pashë, u shemb korridori, bërtisja emrat e fëmijëve. Dera nuk u hap, ishte errësirë, kishte pirg tullash u hodha nga kati i dytë. Unë nuk i kam parë as viktimat, nuk dua t’i kujtoj ashtu, dua t’i kujtoj të lumtur. Djalin tim e gjetën të përqafuar me gruan. Nuk kam forcë të flas, jam i shkatërruar. Nuk ka ardhur njeri të na pyesi.
