Kolegji i Posaçëm i Apelimit e shtyu me tre javë seancën ndaj gjyqtarit, Edmond Islamaj për t’i dhënë kohë subjektit për të legalizuar ‘sipas ligjit’, dokumentet e siguruara nga autoritetet italiane mbi udhëtimet jashtë shtetit.
Nga Besar Likmeta
Kolegji i Posaçëm i Apelimit i përbërë nga Luan Daci si kryesues, Sokol Çomo relator dhe anëtarë gjyqtaret Ina Rama, Rezarta Schuez dhe Albana Shtylla, mbajti të martën seancën e nëntë ndaj gjyqtarit të Gjykatës së Lartë, Edmond Islamaj.
Islamaj u konfirmuar në detyrë nga Komisioni i Pavarur i Kualifikimit por vendimin i KPK-së u ankimuan në Kolegj nga Komisionerit Publik Florian Ballhya.
Pas hapjes së seancës, kryesuesi Luan Daci i kërkoi subjektit dorëzimin e dokumenteve shtesë të kërkuara nga Kolegji në lidhje me udhëtimet e tij në Itali tek të afërmit dhe udhëtimet e mundësuara nga disa organizata të shoqërisë civile.
Gjyqtari Islamaj prezantoi përpara trupës gjykuese të Kolegjit një numër certikatash rezidence, për shtetasit me banim në Xhenova, Dritan Islamaj, Afërdita Brami, Astrit Domi si dhe të shtetasit Enkeled Xhaxho në Milano. Subjekti paraqiti gjithashtu dy certifikata regjistrimi të organizatave jofitimprurëse, ‘Medusa’ dhe të ‘Instituto per le Relazioni Italia-Albania.’
Islamaj njoftoi se edhe pse dokumentet e sjella në seancë ishin origjinale, një pjesë prej tyre nuk ishin të legalizuara me vulë apostile.
Komisioneri Publik, Florian Ballhysa i tha gjykatës se ai mund të shprehej mbi këto dokumente dhe ndikimin e tyre në analizën financiare të të ardhurave dhe shpenzimeve të subjektit, vetëm kur të jenë administruar dokumente të legalizuara me vulë apostile.
Trupa e gjyqtareve u tërhoq për konsultime dhe pas 30 minutash debati, vendosi t’i japë Islamajt kohë deri me datë 17 prill për legalizimin e dokumenteve nga shteti Italian.
