Kryetari i PD-së në Librazhd, Bujar Vreto është proceduar penalisht nga policia, pas tentativave ditën e sotme për të t’i bllokuar rrugën eskortës së kryeministrit Rama paraditen e sotme.
Sipas “NeWs24”, veç kryetarit të PD-së, janë proceduar penalisht edhe pesë persona të tjerë, simpatizantë të Partisë Demokratike.
Personat e proceduar janë: Arben Kurti, Roland Abazi, Xhevdet Balliu, Florant Vreto, Arjanit Leka. Një grup qytetarësh të Librazhdit dhe simpatizantë dhe drejtues të degës së PD-së kishin dalë në hyrje të Bay pas të këtij qyteti për të protestuar kundër Kryeministrit Edi Rama dhe qeverisjes së tij.
Kreu i Qeverisë ishte i pranishëm mesditën e sotme në Librazhd në kuadër të turit “Bashkia që duam”, ku premtoi se do t’i çojnë deri në fund të gjitha detyrat dhe reformat që kanë ndërmarrë, duke shtuar se “nuk i lënë në mes të rrugës” siç bëri opozita.
Gjatë fjalës së tij ai komentoi sërish vendimin e opozitës për të lënë mandatet, duke thënë se tashmë parlamenti pa ta është më normal dhe se “vonë u kujtuan për tu larguar”.
