Hipoteka e Elbasanit ka gati certifikatat e pronës për shtëpitë dhe parcelat ndërtimore të 203 personave, të cilët kanë ndërtuar pa leje. Lista e aplikuesve të pajisur me certifikata pronësie sipas lejeve të legalizimeve dhe VKM për parcelat ndërtimore bëhet e ditur nga burime zyrtare pranë hipotekës, sipas të cilave mësohet se kanë përfunduar të gjitha procedurat për pajisjen me tapi të 203 pronarëve në qarkun e Elbasanit. “Gazeta Shqiptare” publikon listën e plotë me përfituesit.
Ligji
Sipas ligjit në fuqi, personat që kanë ndërtuar pa leje nuk janë të detyruar të tërheqin lejet e legalizimeve dhe më pas të regjistrojnë pronën në hipotekë. Kjo procedurë realizohet nga ALUIZNI. Qytetarët çlirohen nga tarifa 5 mijë lekë dhe certifikatat e pronësisë do t’u shkojnë në shpi. Vendimi është botuar në Fletoren Zyrtare, hyn në fuqi sot dhe parashikon që personat që kanë ndërtuar pa leje, që kanë vetëdeklaruar dhe kanë paguar faturën për parcelën ndërtimore do të marrin tapitë e shtëpive nga ALUIZNI. Afati për pajisjen me certifikatën e pronësisë shkurtohet në 10 ditë nga data e miratimit të lejes së legalizimit. Personat që janë në proces legalizimi dhe kanë paguar rregullisht faturën energjisë elektrike gjatë gjithë vitit të fundit përfitojnë 10% zbritje nga fatura për pagesën e truallit. Këto janë ndryshimet kryesore të miratuara në mbledhjen e fundit të Këshillit të Ministrave. Në vendim përcaktohet se kërkesa për shërbimin e regjistrimit të lejes së legalizimit dhe për lëshimin e certifikatës së pronësisë, për pasurinë e legalizuar, paraqitet nga ALUIZNI në emër të përfituesit të lejes, sipas formularit të kërkesës, të miratuar nga ZRPP-ja.