Shqipëria duket se është shumë afër hapjes së negociatave me Bashkimin Europian. Ambasadori i Rumanisë në Tiranë Mircea Perpelea u shpreh se vendi i tij mbështet Shqipërinë për anëtarësim në BE, duke theksuar se një nga pikat kryesore të punës së tyre ka qenë pikërisht zgjerimi i BE. Në ceremoninë përmbyllëse të Presidencës Rumune në Këshillin e BE, ai tha se 6 mujori i parë i këtij viti ka pasur një sërë projektesh të rëndësishme, duke shtuar se në tetor do jepet drita jeshile. “Rumania mbështet Shqipërinë në sfidat drejt integrimit në Bashkimin Europian. Rumania ka marrë disa hapa pozitivë konkretë dhe ka përcjellë mesazhe pozitive për përgatitjen e Shqipërisë dhe për hapjen e negociatave me BE-në. Rumania ka qenë partner në procesin e çeljes së negociatave dhe në vendimin substancial që duhet të merret sa më shpejt në tetor 2019. Gjatë presidencës së saj, Rumania ka pasur disa rezultate. Jemi përpjekur të punojmë për të ardhmen e BE-së. 6-mujori i parë i këtij viti pati disa projekte të rëndësishme dhe u përballëm me sfida po ashtu. Presidenca ka arritur disa suksese dhe progres në drejtim të sigurisë së Europës dhe mbi të gjitha për Europën e vlerave të përbashkëta”, u shpreh ambasadori i Rumanisë ë Tiranë Mircea Perpelea. Ambasadori i BE në Tiranë Luigi Soreca vlerësoi punën e bërë përgjatë këtyre muajve, të cilat i cilësoi si të vështira për Europën. Në fjalën e tij, gjatë ceremonisë përmbyllëse të Presidencës Rumune në Këshillin e BE, Soreca tha se Presidenca Rumune ka bërë përpjekje të shumta në rajon, veçanërisht në zgjerimin e këtij unioni me vendet e Ballkanit Perëndimor, përfshirë edhe Shqipërinë, ku dhe ka dhënë rekomandime pozitive për vendin tonë. “Edhe në fushën dixhitale, Presidenca Rumune ka bërë përpjekje të shumta në rajon dhe të gjitha këto në një vështirësi të klimës politike. Të gjitha këto janë bërë në kushte të vështira. Samiti i 9 maji ka qenë mjaft i rëndësishëm për të gjithë punën tonë dhe kjo është një nga ngjarjet tona më të rëndësishme, përfshi këtu edhe çështjen e zgjerimi, që ka qenë pjesë e axhendës. Patjetër që kjo është e vështirë. Presidenca Rumune ka bërë shumë gjatë gjithë kësaj periudhë. Patjetër që është përballur me një moment kompleks. BE po vendos liderët e rinj në 16 korrik, ku do ketë një debat sa i përket presidenti të Komisionit Europian; Po bëjmë një reformim të ri të pozicioneve në Bashkimin Europian. Pozicione e reja te Komisionit Europian, i marrin detyrat në fund të tetorit. Ekzekutivi është duke bërë proceduat që të finalizojnë punën dhe të përcaktojnë detyra dhe pozicionet e reja. Është periudhë e ngjeshur për BE. Urime për punën që keni bërë gjatë gjithë kësaj kohe nën presidencën rumune”, tha Soreca.