Gjeorgjia filloi sot manovrat e përbashkëta ushtarake me NATO-n, disa ditë nga 10-vjetori i luftës së saj me Rusinë për kontrollin e Republikës separatiste gjeorgjiane të Osetisë së Jugut.
Më shumë se 3 000 ushtarë gjeorgjianë dhe të NATO-s, të ardhur kryesisht nga SHBA-ja, Franca, Gjermania, Britania e Madhe dhe Turqia, do të marrin pjesë në këto manovra që do të zgjasin deri më 15 gusht.
Ministri gjeorgjian i Mbrojtjes, Levan Izoria, përshëndeti sot këto manovra të quajtura “Noble Partner 2018” si një provë e rritjes së mbështetjes ndaj Gjeorgjisë nga ana e partnerëve strategjikë, vendeve anëtare të NATO-s.
SHBA-ja ka dërguar për këto manovra automjete të blinduara Stryker dhe Bradley, tanke M1A2, helikopterë sulmues Boeing AH-64 Apache dhe Sikorsky UH-60 Black Hawk.
Gjeorgjia shpreson të integrohet në Aleancën Atlantike, drejtuesit e të cilës kanë premtuar në vitin 2008 që ajo do të mund të bëhet një ditë pjesë e organizatës.
