Centralet bërthamore të Çernobilit dhe Zaporizhjas, që janë nën kontrollin e forcave ruse, po operohen dhe menaxhohen nga stafi ukrainas, tha Agjencia ruse e Energjisë Bërthamore, Rosatom, sipas agjencisë Ria.
Në deklaratën e Rosatom u tha se me ndihmën e specialistëve rusë është rregulluar furnizimi me energji elektrike në centralin e çmontuar të Çernobilit.
Në këtë central, më 1986 ka ndodhur aksidenti më i rëndë bërthamor në botë.
Autoritetet ruse po ashtu thanë se aktivitetet për të garantuar siguri në centralet bërthamore ukrainase po ndërmerren në koordinim me Agjencinë Ndërkombëtare për Energji Bërthamore.
Ukraina ka paralajmëruar për rrezikun e rrjedhjes së rrezatimit në Çernobil, nëse nuk rikthehet furnizimi me energji, që ishte dëmtuar gjatë luftimeve me forcat ruse.
Të premten, kompania shtetërore për energji bërthamore e Ukrainës, Energoatom tha se stafi në Zaporizhja – centralit më të madh bërthamor në Evropë – ishte nën presion të madh psikologjik nga prezenca ruse në këtë uzinë.
