Një shqiptar i dënuar me 5 vjet burgim për vjedhje me dhunë është arrestuar në Budapest, me qëllim ekstradimi në Shqipëri.
Bëhet fjalë për Auron Hajdinin, i njohur edhe si Auron Hysaj, 45 vjeç, i cili ishte shpallur në kërkim ndërkombëtar, pasi Gjykata e Apelit Tiranë e dënoi me 5 vjet heqje lirie. Nga kjo masë, atij i mbeten për të vuajtur 2 vjet, 11 muaj e 16 ditë.
Ngjarja për të cilën është dënuar daton në vitin 2013, kur Hajdini, në bashkëpunim me persona të tjerë, ka ushtruar dhunë ndaj rojës së një pusi nafte dhe më pas ka vjedhur një sasi nafte, një automjet, një armë gjahu, një celular dhe disa dokumente.
Autoritetet hungareze pritet të përfundojnë procedurat për ekstradimin e tij në Shqipëri, ku do të vuajë pjesën e mbetur të dënimit.
