Një shtetas shqiptar 56-vjeçar është arrestuar në Connecticut nga autoritetet amerikane, në kuadër të një operacioni të posaçëm të emigracionit.
Bëhet fjalë për Hasan Billën, banues në Wolcott, i cili u arrestua më 3 shtator nga agjentët e ICE Boston. Sipas autoriteteve amerikane, Billa ndodhej në mënyrë të paligjshme në Shtetet e Bashkuara dhe kishte ndaj tij akuza të hapura në nivel shtetëror.
Akuzat lidhen me një hetim të zhvilluar më 28 maj në Hartford për shfrytëzimin e të miturve. Mes tyre janë tentativa për sulm seksual të shkallës së dytë, tentativa për abuzim seksual të një të mituri dhe tentativa për rrezikimin e një të mituri përmes kontaktit seksual me një person nën 16 vjeç.
Hetimi u zhvillua nga Policia e Hartfordit, në bashkëpunim me Task Forcën e FBI-së për Krimet ndaj Fëmijëve dhe Trafikimin e Qenieve Njerëzore.
Sipas policisë, një detektiv nën mbulim u paraqit online si një vajzë 15-vjeçare. Billa dhe dy persona të tjerë udhëtuan drejt një vendi të përcaktuar në Hartford, duke besuar se do të takonin një të mitur për marrëdhënie seksuale.
Të tre u arrestuan pa incidente. Në raportimet e kohës, për ta ishte vendosur një garanci fillestare prej 500 mijë dollarësh.
Arrestimi i Billës u bë publik nga ICE Boston më 25 shtator, si pjesë e operacioneve të synuara të agjencisë në zonën e Wolcott.
Deri tani, ICE nuk ka publikuar detaje të tjera mbi historikun e emigracionit të 56-vjeçarit apo mbi statusin e tij aktual të paraburgimit dhe procedurat e mundshme të dëbimit. Akuzat mbeten pretendime të ngritura nga autoritetet dhe nuk përbëjnë një dënim penal.
