Një turist finlandez ka humbur jetën mëngjesin e sotëm në Rodos të Greqisë pasi është përplasur për vdekje nga një automjet i drejtuar nga një shqiptar.
Ngjarja tragjike ndodhi rreth orës 05:30 në aksin Rodos-Kallithea, në lartësinë e kilometrit 15 të rrugës, në drejtim nga Rodos në Faliraki, përballë hotelit “Sun Pallace”. Automjeti, një Peugeot i drejtuar nga Banush Aliaj, 34 vjeç, lindur në Berat dhe banues në Rodos, ka goditur shtetasin finlandez Juha Markuu Antero Toivonen, 47 vjeç, gjatë përpjekjes së tij për të kaluar rrugën në një pikë ku nuk kishte vendkalim për këmbësorët.
Pas ngjarjes, Juha Markuu Antero Toivonen është transportuar me autoambulancë në Spitalin e Përgjithshëm të Rodos, ku, për fat të keq, është konstatuar vdekja e tij.
Autoritetet lokale janë duke hetuar rrethanat e aksidentit për të zbuluar se çfarë ka ndodhur pikërisht në momentin e tragjedisë dhe për të përcaktuar përgjegjësinë ligjore në lidhje me ngjarjen.
