Ka përfunduar dëshmia e “bashkëpunëtorit” të drejtësisë Luftar Reçit në lidhje me vrasjen e Vajdin Lames dhe Klodian Saliut, ngjarje kjo e ndodhur 18 vite më parë. Gjykata vendosi të shtyjë seancën më 3 prill për t’i dhënë kohë avokatëve që ta marrin në dispozicion audion e seancës së sotme për t’i ballafaquar me deklarimet e dhëna gjatë fazës hetimore.
Nga burgu i Drenovës ku vuan dënimin, Reçi u transportua drejt GJKKO nën masa të rrepta sigurie pasi kërkesa e tij për të dëshmuar me skype nuk u pranua.
Me kërkesë të SPAK, trupi gjykues vendosi që seanca të mbahet me dyer të mbyllura, me argumentin se cenohet siguria e dëshmitarit dhe në të njëjtën kohë mund të bëhen të dhëna publike që mund të cenojnë procesin.
Gazetari i ABC News, Ermal Vija raporton e Luftar Reçi ka treguar detaje mbi vrasjet e mësipërme, por pavarësisht kësaj, janë ngritur dyshime se ka gënjyer në deklarimet e tij.
“Ai ka përmendur vrasjen e Klodian Saliut dhe se këtë e ka bërë me porosi të Lulzim Berishës, ndërsa të implikuar janë përmendur Plaurent Dervishaj dhe Indrit Taullai. Ai ka treguar me detaje edhe përgatitjet e këtij atentati. Ai po ashtu ka treguar edhe vendosjen e një sasie tritoli të vendosur në ashensorin ku mbeti i vrarë Vajdin Lames dhe mikut i tij, Artan Arsi. Avokatet mbrojtës do kenë të drejtë të dëgjojnë dëshminë në seancën e sotme. Edhe në ditën e sotme ka pasur mospërputhje në deklarimet e Reçit”, tha ai.
Të pandehur për këto dy vrasje janë marrë, Viktor Ymeri, Emilajno Shullazi, Plaurent Dervishaj, Lulzim Berisha, Indrit Rusi, Indrit Taullai dhe Luftar Reçi.
