U lajmërua për të ndihmuar një familje, banesa e së cilës ishte përfshirë nga flakët, zjarrfikësi gjen të pajetë familjarët e tij.
Tre fëmijë dhe shtatë të rritur kanë vdekur si pasojë e zjarrit të rënë në një banesë në Pensilvani në SHBA.
Autoritetet kanë nisur një hetim penal për të verifikuar shkaqet e zjarrit, ndërsa sipas informacioneve paraprake dyshohet se zjarri ka nisur në verandë.
Harold Baker, një zjarrfikës i kompanisë vullnetare të zjarrfikësve Nescopeck, tha për agjencinë e lajmeve Associated Press se të vdekurit ishin djali, vajza, vjehrri, kunati, kunata, tre nipërit dhe dy të afërm të tjerë të tij. Ai ishte i shokuar pasi u përball me këtë ngjarje të rëndë.
Policia deri më tani ka identifikuar viktimat si Dale Baker, 19 vjeç, Star Baker, 22 vjeç, David Daubert Sr, 79 vjeç, Shannon Daubert, 42, Laura Daubert, 47 vjeç dhe Marian Slusser, 54 vjeç, shkruajnë mediat e huaja.
Harold Baker, tha se djali i tij, Dale, kishte ndjekur hapat e tij duke iu bashkuar shërbimit zjarrfikës.
Baker i tha gazetës Citizens’ Voice në qytetin Wilkes-Barre: “Kur u afruam në rrugën Dewey e kuptova menjëherë se e kujt ishte banesa.”
