Vendoset sekuestro preventive për një llogari bankare në shumën 400 mijë dollarë, në emër të biznesmenit Aleksandër Gavoçi, nga Tirana.
Biznesmeni po tentonte t’ia kalonte këto 400 mijë dollarë vëllait të tij Ilir Gavoçi në Australi i cili është në kërkim për shkak të një vrasje të katërfishtë kryer 15 vite më parë.
Ilir Gavoçi, së bashku me truprojën e tij Ismet Oruçi, vranë në lokalin ‘Olalba’ në afërsi të gardës, 4 persona, Ali Beqjen 29 vjeç, ish-oficerin në ministrinë e Brendshme Altin Djegpaxhian, 34 vjeç, Alban Krujën 35 vjeç dhe Elvis Berberin 25 vjeç, që të kartër nga Shkodra.
Në vitin 2007 Gavoci u dënua me 5 vite por nuk u arrestua asnjëherë.
Në 2012-ën, Prokuroria kërkoi shuarjen e vendimit për shkak se nuk u arrestua gjatë këtyre 5 viteve. Kërkesa u pranua dhe ai u shpall i lirë.
NJOFTIM I POLICISË:
Sekuestroja preventive ndaj një llogarie bankare të administratorit të në një shoqërie SHPK, pas hetimit të nisur nga Seksioni për Hetimin e Pastrimit të Parave në DVP Tiranë, në koordinim nga Departamenti i Policisë Kriminale dhe nën drejtimin e Prokurorisë së Rrethit Gjyqësor Tiranë.
Specialistët e Seksionit për Hetimin e Pastrimit të Parave në DVP Tiranë kishin dërguar materialet paraprake hetimore në Prokurorinë e Rrethit Gjyqësor Tiranë, e cila regjistroi procedimin penal për veprat penale “Pastrimi i produkteve të veprës penale ose të veprimtarisë kriminale” dhe “Ushtrim pa licencë i veprimtarisë financiare”.
Në zbatim të këtij procedimi, në bashkëpunim me Prokurorinë pranë Gjykatës së Shkallës së Parë Tirane, për identifikimin dhe gjetjen e aseteve kriminale që rrjedhin nga veprimtaria kriminale, në funksion të procedimit penal të vitit 2020 dhe vendimit të sekuestrimit datë 26.05.2020, u bë sekuestrimi i llogarisë bankare në shumën 400 mijë dollarë, në emër të shtetasit A. G., administrator i një shoqërie SHPK, për veprat penale “Pastrimi i produkteve të veprës penale ose të veprimtarisë kriminale” dhe “Ushtrim pa licencë i veprimtarisë financiare” .
Vendoja e sekuestros preventive, pas tentativës së bërë nga shtetasi A. G., për transfertën e shumës jashtë vendit, në Australi, në llogari të vëllait të tij.
Nën drejtimin e Prokurorisë po vijon puna për të zbuluar asete të tjera dhe bashkëpunëtorët në këtë aktivitet kriminal.
