Kryetari i PD-së, Lulzim Basha sot në orën 09:00 është thirrur nga prokuroria e Krimeve të Rënda për të dëshmuar në lidhje me dosjen e njohur si “Toyota Yaris”, ku u kapën 3.4 milionë euro. Për këtë hetim kanë mbërritur në Shqipëri katër prokurorë belgë të cilët do të asitojnë në marrjen në pyetje të liderit demokrat, raporton gazetari Arsen Rusta.
Belgët i kërkojnë Bashës përgjigje për tre pyetje. Pyetja e parë është: Si u informua Basha për sasinë prej 3,4 milionë Euro? Cilat ishin informacionet ekzakte? Si dhe kush ia dha zotit Basha këtë informacion? Por a do të shkojë Basha nesër në prokurori?
Ende nuk dihet nëse lideri demokrat do të shkojë në prokurori, por selia blu deklaroi dy ditë më parë se Basha ka shprehur ‘gatishmërinë e plotë të kontribuojë në hetimin e autoriteteve të drejtësisë belge për dosjen e njohur si “Toyota Yaris”, ku u kapën 3.4 milionë euro’, duke lënë të nënkuptuar se do të paraqitet.
Po sipas PD-së, kryetari i opozitës është shprehur i “gatshëm për të ndihmuar me informacionet që disponon në zbardhjen e lidhjeve kriminalo-politike në aferën e pastrimit të miliona eurove me garanci politike të përfaqësuesve më të lartë të kupolës së Rilindjes.
Zoti Basha është në kontakt me autoritetet belge dhe mbetet në pritje të rakordimit me to për mënyrën e bashkëpunimit” thuhej në reagimin e selisë blu.
Aksioni për bllokimin e 3.4 mln eurove u finalizua me 24 qershor të vitit të kaluar, ndërsa eurot me prerje të ndryshme ishin fshehur në “Toyota Yaris” pa targa. Kryedemokrati Basha ishte personi që denoncoi në Kuvend çështjen e “Toyota Yaris”.
Hetimet për “ToyotaYaris” ku u sollën nga Belgjika 3.4 mln euro po kryhen në dy vendet. Për këtë procedim janë arrestuar 4 persona dy dhe janë shpallur në kërkim kushërinjtë, Alfred e Elvis Vladi, për të cilët dyshohej se ishin personat që kanë porositur makinat Toyota Yaris. Katër të arrestuarit në Shqipëri janë Edi Lika, Klevi Lika, Agim Ceka dhe Alban Mollaymeri.
Gjyqtari Luan Hasnezirin i cili pranoi kërkesën e Prokurorisë për të marrë në pyetje kryetarin e PD-së Lulzim Basha, për llogari të gjykatës belge për dosjen “Toyota Yaris”, u shkarkua më pas nga vettingu.
