Ligjshmërinë e zgjedhjeve vendore të 30 qershorit po fillon ta njohë edhe opozita. Pavarësisht se PD-LSI bënin thirrje për rezistencë, duke kërkuar nga bashkitë e tyre të mos i lironin zyrat, tashmë janë tërhequr. Një gjë e tillë u duk qartë ditën e djeshme, ku në bashkitë e drejtuara nga opozita zyrat janë liruar pa asnjë problem.
Në Kukës, ku PD kishte paralajmëruar qëndresë dhe protesta, betimi i kryebashkiakut Safet Gjici është bërë qetësisht në sallën e mbledhjeve në godinën e Prefekturës. Më pas, Gjici u fut në zyrën e tij, ku nuk kishte asnjë përfaqësues të PD, por vetëm sekretari. I pranishëm në ceremoninë e betimit të kryebashkiakut të Kukësit ishte ministri i Jashtëm në detyrë Gent Cakaj.
Një tjetër bashki që kaloi pushtetin në mënyrë paqësore ishte dhe ajo e Skraparit. Ndonëse kjo bashki drejtohej nga LSI, betimi i Adriatik Memës u bë në sallën e Këshillit Bashkiak, ku pushteti vendor u kalua në mënyrë paqësore dhe pa rezistencë. Ditën e djeshme u konstituua edhe Këshilli Bashkiak.
Një tjetër bashki e drejtuar nga LSI ishte dhe ajo e Përrenjasit. Ish kryebashkiakja Miranda Rira bëri thirrje për rezistencë, ku deklaroi se nuk do ta lironte zyrën, me argumentin se do zbatoj dekretin e presidentit. Por pavarësisht kësaj deklarate, kreu i ri i bashkisë, Nuri Belba u betua ditën e djeshme në ambientet e shkollës 9-vjeçare “Qybra Sokoli”.
Po ashtu, në Përrenjas u konstituua edhe këshilli bashkiak. Një tjetër bashki që kaloi pushtetin ishte edhe ajo e Matit. Betimi i kryebashkiakut të ri Agron Malaj u shoqërua vetëm me një protestë të demokratëve, por pa shënuar asnjë incident. Ndërkohë që edhe Juliana Memaj u betua ditën e djeshme për të marrë drejtimin e Bashkisë Ura Vajgurore për 4 vitet e ardhshme.
Por kalim të pushtetit vendor kishte edhe brenda socialistëve. Qazim Sejdini, pas 12 viteve në krye të Bashkisë Elbasan, ia ka dorëzuar drejtimin e saj Gledjan Llatjas. Ceremonia e betimit të tij u bë në ambientet e bashkisë, ku i pranishëm ishte kreu i Grupit Parlamentar socialist Taulant Balla dhe deputetja e zonës Evis Kushi.
Po ashtu, edhe Vangjush Dako ia dorëzoi Durrësin Valbona Sakos, e cila do të drejtojë bashkinë për 4 vitet e ardhshme. E pranishme në ceremoninë e betimit ishte zëdhënësja e qeverisë Elisa Spiropali.