Kleandro Lleshi këtë vit do të luajë në kategorinë e dytë spanjolle, huazuar atje nga radhët e Leganes që zotëron kartonin e talentit të dalë nga akademitë e kryeqytetit shqiptar. Lleshi shihet si një lojtar me shumë të ardhme ndaj Leganes ka vendosur që ta kalojë atë në radhët e një klubi ku të aktivizohet më rregullisht dhe të fitojë eksperiencë.
Për këtë arsye, ai është huazuar te Fuenlabrada, në mënyrë që të luajë sa më rregullisht në këtë vit te skuadra e ngjitur nga kategoria e tretë. Një transferim i rëndësishëm për fubtollistin, që është përshëndetur me një mesazh video nga ish-ylli i Brazilit dhe Real Madrid, Roberto Karlos.
“Përshëndetje Kleandro, jam Roberto Karlos. Të dërgoj një përqafim të madh dhe të uroj sa më shumë fat te Fuenlabrada dhe të shkoftë gjithçka mbarë”, ishin fjalët në mesazhin video të Roberto Karlos për futbollistin shqiptar, i cili e ka publikuar vetë në rrjetet sociale këtë urim shumë të veçantë në fillimin e aventurës së re në karrierën e tij.
