Policia ka shpallur në kërkim minoritarin Manol Vito, i cili më 15 Qershor dogji dy flamuj shqiptarë në Sarandë.
Dyshohet se minorotari ka hyrë ilegalisht në shtetin grek. Mbi të rëndojnë akuzt: ‘Poshtërim i Republikës dhe simboleve të saj’ dhe ‘Nxitje e urrejtjes ose grindjeve’.
Më 15 Qershor Vito, i cili është nga fshati i Finiqit dogji flamujt shqiptarë dhe videon e hodhi në rrjetet sociale.
“Këtu jemi në Vorio Epir”, u shpreh ai teksa iu vuri flakën flamujve kuq e zi në Sarandë.
Videoja u publikua ditën e djeshme në rrjetet sociale, ku Vito njërin prej flamujve e ka djegur pranë bulevardit “Hasan Tahsini” dhe tjetrin në parkun miqësia në qendër të Sarandës. Videon e djegies së flamurit ai e shoqëronte me të tjera provokime të forta. “Këtë flamur e mora nga zyrat e OMONIA-s sepse nuk meriton që të qëndrojë atje dhe po e djeg. Këtu jemi në Sarandë, jemi në Vorio Epir dhe kam gjetur këtë leckë dhe shikoni sesi po digjet, ku janë patriotët dhe nacionalistët shqiptarë?” thotë ai.
Provokimi i minoritarit grek vjen pak ditë pasi Lëvizja patriotike “Djemtë e Labërisë” dogjën flamurin e Vorio-Epirit në varrezat e Këlcyrës, ku prehen eshtrat e 21 ushtarëve grekë të vrarë në luftës Italo- Greke. Këta të fundit zhvilluan protesta ditën e djeshme para Konsullatës Greke në Gjirokastër, për largimin e konsullit grek Lambros Kakizis, protestë e mbyll me gjobë 5 mln lekë për organizatorët.
