Vrasësi Dan Hutra ka dalë ditën e sotme para Gjykatës, në seancën e parë gjyqësore ndaj tij.
Teksa pritej që të jepej dënimi për vrasësin që u mori jetën 3 grave, seanca është shtyrë për shkak të mos plotësimit të trupës gjykuese. Mësohet se një nga anëtaret mungonte, për shkak se ishte e sëmurë. Nga ana tjetër, Hutra është shfaqur i tensionuar pasi nuk është dakord me avokatin që i është caktuar nga shteti për ta mbrojtur. Tensionin ai e ka “shfryrë” dhe tek gazetarët, me të cilët ka debatuar.
Ai u është drejtuar me ton kërcënues, duke thënë “do vijë dhe momenti juaj”.
“Mos gënjeni shumë. Do vijë dhe momenti juaj, do zbërthehen të gjitha gjërat e pavërteta që keni thënë.”– ka thënë vrasësi.
Seanca e radhës pritet të mbahen pas një jave, më 10 shtator në orën 12:30.
Kujtojmë se Hutra akuzohet për 5 vepra penale, ‘Vrasje në rrethana cilësuese, ndaj dy ose më shumë personave’, ‘Vrasje me paramendim’, ‘Vrasje e mbetur ne tentative’, ‘Plagosje rëndë me dashje’, ‘Armëmbajtje pa leje’.
Më 1 mars të vitit 2023, Dan Hutra ka plagosur me armë zjarri shtetaset Elena Hysa, 35 vjeçe, dhe Kujtime Hysa, 60 vjeçe (ish-bashkëjetuesja e tij dhe nëna e saj) dhe ka vrarë me armë zjarri Mevlute Hysën 30 vjeçe, (motra e ish-bashkëjetueses së tij), Hasime Dafku 30 vjeçe, (e fejuara e vëllait të ish-bashkëjetueses) dhe Etleva Kurti, 31 vjeçe.
