Kreu i qeverisë Edi Rama përjashtoi njëherë e mirë mundësinë e diskutimeve me Komisionin e Rithemelimit dhe Sali Berishën për procesin e zgjedhjes së kreut të shtetit.
“Nuk ka akoma një proces. E kam thënë dhe e përsëris që është shumë e qartë vija e kuqe për ne. Ne nuk bëjmë asnjë negociatë dhe nuk kemi asnjë komunikim për të ardhmen me atë që në funksion të politikës është përfaqësues i botës së përtejme”, deklaroi Rama.
Ai u shpreh se do kishin vënë Hashim Thaçin president por për monentin shtoi se ai nuk është një qytetar i lirë.
“Kushtetuta jonë ka parashikuar që president nuk mund të zgjidhet dikush që në 10 vitet e fundit nuk jeton në Shqipëri. Ne do kishim vënë Hashim Thaçin president.
Do ishte president i shkëlqyer për Shqipërinë dhe Kosovën. Por fatkeqësisht për momentin ai nuk është qytetar i lirë pasi ndaj tij po zhvillohet një proces, mos më bëni të them se çfarë procesi është”, tha Rama.
Rama deklaroi në përfundim të mbledhjes së Kryesisë së Partisë Socialiste se presidenti i ri i republikës nuk do të jetë nga grupi parlamentar i PS-së.
“Diskutuam për procesin e identifikimit të kandidaturës së presidentit apo presidentes, pasi ditët po kalojnë dhe procesi i zgjedhjes po afron. Po ta kishim identifikuar një person do ta kishim bërë publik.
Ne kemi mbledhur propozime dhe ajo që kemi thënë publikisht dhe sot në mbledhjen e Kryesisë është se kandidati nuk do të jetë nga grupi parlamentar i PS”, tha Rama.
