Sipas një sondazhi të kryer nga Shoqata “Alzhaimer” në Shtetet e Bashkuara, gjysma e të afërmve të të sëmurëve me Alzhaimer thanë se kujtimet e të dashurve të tyre ishin përkeqësuar në momentin që ata kanë filluar të jetojnë të izoluar.
Studiuesit pranë Universitetit të Kalifornisë pohojnë se gjithashtu është vënë re se probleme me kujtesën kanë pasur edhe njerëzit që kanë një memorie autobiografike shumë të madhe aq sa mund të mbajnë mend dhe ngjarje si blerja e një bilete kinemaje 20 vjet më parë.
Ndaj nëse, që nga nisja e pandemisë, e keni pasur të vështirë të mbani mend t’i dërgoni një e-mail dikujt, të flisni me dikë që duhet të kishit folur apo dhe keni harruar të blini qumështin, nuk jeni të vetmit.
Sigurisht që të dhënat nuk janë përfundimtare dhe është herët që të krahasojmë memorien tonë para pandemisë dhe pas pandemisë, por ajo që duket se është e sigurt është fakti që situata e gjithë këtyre muajve ka përkeqësuar edhe kujtesën tonë.
I ftuar në “Wake Up”, mjeku psikiatër Neli Demi tregoi edhe arsye pse kjo situatë ndikon në psikologjinë e qytetarëve.
“Kohëzgjatja e këtij izolimi, paqartësia në kohëzgjatjen e tij, mungesa e sigurisë që shkakton izolimi në vetvete dhe mundësia e infektimit, problemet e ndryshme që sjell pandemia, pamundësia për rutinën e përditshme, mungesa e kontaktit fizik, të gjitha këto janë ngacmues të problemeve të humorit dhe të ankthit që mund të bëhen shkak pastaj për problemet e memories”, tha ai.
Më tej, mjeku sqaroi: “Meshkujt ose femrat kanë një tendencë për të pasur një qëndrim dhe interes për gjëra të ndryshme, kjo përcakton edhe llojet e gjërave qe në mbajmë mend”.
