Radha për të plotësuar formularin e justifikimit të pasurisë në kuadër të ligjit special për verifikimin e pronave të krimit të organizuar i ka ardhur Dashamir Gjokës, një emër i përfolur dhe akuzuar ndër vite se drejton nga Shijaku aktivitete të paligjshme brenda dhe jashtë vendit.
Dashamir Gjoka është pronar i “Gjoka Shpk”, një kompani e regjistruar që në vitin 2002 fillimisht me objekt importin dhe tregtimin e produkteve ushqimore dhe më vonë edhe në ofrimin e shërbimeve në fushën e hotelerisë dhe turizmit.
Kompania është themeluar nga Arben Gjoka, i cili ka ndërruar jetë në 2006, duke ja lënë kompaninë e ngritur bashkëshortes dhe tre fëmijëve të mitur me nga 25 për qind të aksioneve. Më pas, edhe në emër të fëmijëve të saj, bashkëshortja e Arben Gjokës i ka shitur 100 për qind të aksioneve Dashamir Gjokës.
Kompleksi “Gjoka” është pronësia më e madhe në zotërim të Dashamir Gjokës, por jo e vetmja. Deri në 2015, Gjoka rezultonte pronar i 1800 metrave katrorë pemtari, ndërtesë dhe truall, rreth 20 hektarë tokë arë në Sallmone të Shijakut, 1500 metër katrorë tokë arë në Qerret, një ndërtesë tjetër, plus truall me sipërfaqe 1250 metër katrorë po në Sallmone dhe një pasurie tjetër me sipërfaqe 928 metër katrorë po në Shijak. Këtyre pasurive të paluajtshme u shtohet edhe gjithë vlera e shoqërisë “Gjoka Shpk” dhe të gjitha asetet e saj.
Nga përllogaritjet bëhet fjalë për prona me vlerën e disa milionë eurove, për të cilat “Operacioni Forca e Ligjit” dyshon se kanë si burim aktivitetin e paligjshëm të Dashamir Gjokës, i akuzuar dhe dënuar në të shkuarën për trafik qëniesh njerëzore dhe trafik lëndësh narkotike.
Por, kjo nuk është hera e parë që pronat e Dash Gjokës janë vënë nën sekuestro disa herë. Herën e fundit që kompleksit që ai zotëron dhe pronave të tjera iu vu masa e sekuestros ishte në 2015 me urdhër të Gjykatës për Krimet e Rënda. Por, në të gjitha rastet, Gjoka ja ka dalë mbanë që të mposhtë drejtësinë dhe të gëzojë pasurinë e tij, pasi gjithmonë vendimet përfundimtare ishin në favor të tij.
Dashamir Gjoka i ka fituar të gjitha betejat e tij në të gjitha shkallët e gjyqësorit; e fundit ishte në 2014, kur Kolegji Penal i Gjykatës së Lartë ka dhënë vendim kundër ekstradimit të tij në drejtim të Italisë, ku rezulton i dënuar nga Gjykata e Milanos për trafik qëniesh njerëzore, favorizim prostitucioni dhe trafik lëndësh narkotike.
Kështu ndodhi edhe me masën e sekuestrimit të pronave në 2015. Gjykata e Shkallës së Parë për Krimet e Rënda i dha të drejtë kërkesës së Prokurorisë dhe la në fuqi masën e sekuestrimit për pronat e tij. Por, vendimi u apelua në Gjykatën e Apelit për Krimet e Rënda. Kjo gjykatë e rrëzoi vendimin në 2017-ën duke i zhbllokuar pronat në fjalë.
Prokuroria kundërshtoi këtë vendim dhe foli për keqinterpretim të ligjit nga ana e Gjykatës së Apelit. Prokuroria denoncoi se Gjykata e Apelit përmes një “eksperti provoi” se Dashamir Gjoka gëzonte pronat e sekuestruara para vitit 1999, kohë kur ka ushtruar aktivitetin kriminal për të cilin është dënuar nga drejtësia italiane.
Organi i akuzës tha se për të “provuar” këtë, eksperti i thirrur nga Gjykata e Apelit kishte përdorur programin “Google Earth”, një që vetë është hedhur në treg për përdorim në vitin 2001. Gjithsesi, përmes imazheve të “Google Earth”, që u vlerësuan si foto para 1999, Gjykata e Apelit kishte pranuar argumentin e palës mbrojtëse se Dashamir Gjoka i gëzonte këto prona para se të përfshihej në aktivitete kriminale dhe ja zhbllokoi ato.
Për të justifikuar pasurinë e tij, Dashamir Gjoka nga viti 2007 e diri në 2012 ka marrë shuma të konsiderueshme kredie në një bankë të nivelit të dytë në Shqipëri për të zgjeruar bizneset e tij.
Ndërkohë nga dosja që ALUIZNI hartoi për kompleksin “Gjoka” vlera e ndërtimit të tij shkoi në rreth 1.8 miliard lek, ndërkohë që Krimet e Rënda në 2015 besonin të ardhurat e deklaruara prej Dashamir Gjokës nuk justifikojnë as burimin e parave përmes të cilave ka shlyer kreditë, as burimin e parave të përdorura për ndërtimin e këtij kompleksi.
Historia e një prej emrave më të lakuar të Shijakut
Aktiviteti kriminal i Dashamir Gjokës besohet se ka nisur që në mes të viteve ’90. Emri i tij është lakuar si autori i vrasjes së një shkodrani në Itali në vitin 1996 dhe shkak kanë qenë përplasjet për kontrollin e zonave të prostitucionit. Pa kaluar shumë kohë nga kjo ngjarje, emri i Dashamir Gjokës përflitet si autori i vrasjes së një vajze dhe torturimit të një tjetre, por drejtësia nuk ka provuar asnjëherë këtë akuzë.
Në vitin 1999 Dashamir Gjoka u akuzua si autori i vrasjes së Veli Rexhës në Shijak dhe është përfolur se qëndron edhe pas disa veprave të tjera penale të ndodhura në vitet e mëvonshme në Shijak dhe Durrës, por asnjëherë nuk ka patur prova për këtë.
Nga 2005 deri në qershor të 2013 emri i tij nuk u lakua më publikisht. Gjërat ndryshuan në qershor të 2013, kur drejtësia shqiptare bëri publik një urdhër arresti të marrë nga pala italiane, por që mbante datën 30 nëntor 2009.
Mbetet e paqartë se pse ky urdhërarresti i italianëve ka qëndruar për dy vite në sirtarët e drejtësisë shqiptare, ndaj personit që gjykata e Milanos e kishte dënuar me 8 vite burg për organizatë kriminale me qëllim organizimin e emigracionit klandestin.
Në seancën e parë të caktimit të masës së sigurisë, Gjykata e Durrësit vendosi të caktojë masën detyrim paraqitjeje për Dashamir Gjokën. Pak ditë më vonë, Ministria italiane e Drejtësisë dorëzoi në Shqipëri kërkesën për ekstradimin e tij.
Kërkesa duhej të miratohej ose rrëzohej nga gjykatat shqiptare. E para që rrëzoi kërkesën e italianëve ishte Gjykata e Durrësit. Prokuroria e Apeloi vendimin dhe apeli pati të njëjtin fat edhe në Gjykatën e Apelit të këtij qyteti. Organi i akuzës bën rekurs në Gjykatën e Lartë, kolegji i së cilës vendosi në mes të 2014-ës lënien në fuqi të vendimeve të dy gjykatave të mëparshme.
Arsyetimi i Gjykatës së Lartë ishte se nuk kishte prova ndaj Dashamir Tahirit dhe me një vendim tjetër, gjykata rrezikonte që t’i shkeljte të drejtat themelore të akuzuarit nga drejtësia italiane.
Gjykata italiane e akuzonte Dashamir Gjokën se nga Shijaku drejtonte një rrjet të gjerë prostitucioni në Itali dhe ndër të tjera kontrollonte dhe rrugët klandestine të trafikut të grave nga Durrësi dhe Vlora.(SI)
