Në këtë tryezë merrnin pjesë Ministrja e Infrastrukturës dhe Energjisë, Belinda Balluku, Ambasadorja e SHBA në Tiranë, Yuri Kim, Ndihmës Sekretari për Hidrokarburet në Departamentin Amerikan të Energjisë, Steven Winberg, drejtues institucionesh si dhe ekspertë amerikanë dhe shqiptarë në fushën e gazit të lëngshëm. Në fjalën e saj, ministrja e Infrastrukturës dhe Energjisë, Belinda Balluku theksoi rëndësinë strategjike, por edhe ekonomike që ka organizimi i këtij takimi.
“Ky takim ndërinstitucional dhe gjithëpërfshirës është i rëndësishëm për Shqipërinë për dy arsye: Së pari, ky bashkëpunim do të përforcojë më tej partneritetin strategjik, të konsoliduar tashmë midis Shqipërisë dhe Shteteve të Bashkuara të Amerikës dhe së dyti, sepse studimi i potencialit të depërtimit të gazit natyror të lëngshëm në shkallë të vogël dhe shpërndarjen me kontenier në tregun shqiptar është një mundësi e shkëlqyer për ne”, u shpreh Balluku Qeveria Shqiptare ka prioritet zhvillimin e tregut të gazit dhe për këtë është angazhuar plotësisht në përmirësimin e vazhdueshëm të kornizës ligjore, fiskale, administrative dhe rregullatore.
Duke folur për projektet e parashikuara në këtë drejtim ministrja Balluku tha: “Masterplani ynë për gazifikimin e Shqipërisë, përfshin ndërlidhje të shumta me rajonin dhe rrjetet evropiane të gazit, dhe parashikon disa shtylla kryesore për zhvillimin e tij si Gazsjellësin Adriatiko-Jonian dhe atë ALKOGAP, por vlen të theksohet dhe ambicia jonë për krijimin e një Depozite Nëntokësore Gazi në Shqipëri. Shqipëria po konsideron gjithashtu një Terminal LNG në bregdet, si një burim alternativ furnizimi dhe si një ndër komponentët e sistemit të ‘depozitimit të energjisë’”.
Ministrja vlerësoi se studimi, me përkrahjen e Departamentit Amerikan të Energjisë, për këtë element të ri energjetik për Shqipërinë, do përshpejtojë futjen e gazit natyror në vendin tonë, krijon hapësira të reja investimi, si dhe ofron mundësi punësimi duke ndikuar direkt në ekonominë e vendit. Nga ana e saj ministrja Balluku garantoi se Ministria e Infrastrukturës dhe Energjisë do të reflektojë me vëmendje mbi gjetjet e këtij studimi dhe do të implementojë sugjerimet e tij, në mënyrë që të përparojë dhe lehtësojë penetrimin e gazit natyror të lëngshëm në Shqipëri edhe përpara vendosjes së tubacioneve.
Në mbyllje të fjalës së saj, duke falenderuar organizatorët e tryezës e në mënyrë të veçantë Ndihmës Sekretarin Winberg dhe Ambasadoren Kim, ministrja Balluku shprehu besimin e saj të plotë se përmes nismës për zgjerimin e eksporteve amerikane të energjisë dhe rritjen e sigurisë së energjisë kudo në botë, Shqipëria do të përfitojë duke zbatuar strategjinë qeveritare për diversifikimin e burimeve, me rezultat uljen e importeve dhe rritjen e sigurisë dhe pavarësisë energjetike.
