Qeveria shqiptare ka marrë një vendim për të gjithë naftëtarët që kanë mbetur të papunë si pasojë e situatës në rafineritë e Ballshit dhe Fierit. Në një deklaratë për mediat, ministri i Financave Arben Ahmetaj ftoi të gjithë naftëtarët e papunë që të aplikojnë për statusin e papunësisë, në mënyrë që të përfitojnë sa më parë pagesën e papunësisë.
Sakaq, ministri Ahmetaj tha se qeveria shqiptare është e hapur për të mbështetur çdo investitor serioz që do të vijë me një projekt serioz për këto dy rafineri.
“Ftoj të gjithë naftëtarët që të aplikojnë për statusin e papunësisë, në mënyrë që ata punonjës që janë pa punë nga të dy rafineritë të përfitojnë pagesë e papunësinë. Naftëtarët të cilët kanë mbetur të papunë do të marrin pagesën e papunësisë në bazë të ligjit. Qeveria qëndron e angazhuar, e vëmendshme deri në detaje për të mbështetur çdo investitor serioz, që do të vijë me një projekt serioz për zhvillimin e biznesit në rafineritë e Ballshit dhe të Fierit, apo një ofertë nga investitorë seriozë për zhvillimin e një biznesplani në sektor ku përfshin edhe vënien në punë të të dy rafinerive.
Qeveria është e angazhuar të jetë pranë naftëtarëve duke i ndihmuar me procedurat, duke i vënë në dispozicion zyrat e punës në mënyrë që ata të përfitojnë pagesën e papunësisë. Dhe jemi në gatishmëri të vëmendshme deri në detaje për të mbështetur çdo iniciativë private për rivënien në punë të dy rafinerive.
