OFL sot është ndalur në Tiranë tek dy persona për të cilat Gjykata e Tiranës ka marrë vendime lidhur me grabitjet që kanë kryer në bashkëpunim apo me armë.
Formulari i vetdeklarimit të pasurisë i është dërguar Elis Gjypi, i cili është dënuar për vjedhje me armë në bashkëpunim si dhe Genci Prifti për të cilin është caktuar arrest me burg për vjedhje në bashkëpunim, vjedhje bankash në bashkëpunim apo armëmbajtje pa leje.
Këta persona kanë 48 orë kohë të përgjigjen me shkrim kërkesës dhe pyetjeve të OFL ose në të kundërt i sekuestrohen pasuritë.
NJOFTIMI NGA POLICIA
OFL, 16 qershor
Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
– E. Gj., banues në Tiranë, i dënuar nga Gjykata e Rrethit Gjyqësor Tiranë, për veprën penale “Vjedhja me armë, e kryer në bashkëpunim”;
– G. P., banues në Tiranë, për të cilin Gjykata e Rrethit Gjyqësor Tiranë ka caktuar masën e sigurisë “Arrest në burg”, për veprat penale “Vjedhja, e kryer në bashkëpunim”, “Vjedhja e bankave, e kryer në bashkëpunim” dhe “Armëmbajtja pa leje”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
