Si çdo fundviti, mediat përzgjedhin ngjarjet kryesore që shoqëruan vendin.
Kuptohet, zhvillimet politike janë ato në qendër të vëmendjes.
Në Shqipëri, dy kanë qenë zhvillimet kryesore: Reforma në drejtësi dhe çadra e ngritur nga opozita kundër saj.
Ishin edhe zgjedhjet parlamentare, por ato nuk patën histori, pasi Edi Rama fitoi bindshëm ndaj një opozite të dobët e të përçarë, e cila për më tepër vuajti pasojat e aksionit të saj anti-perëndimor, për të penguar miratimin e reformës në drejtësi.
Gazetari Lutfi Dervishi shkruan me ironi se ky ishte viti i opingës:
“Dy lajmet më të shumta për 2017 ishin :
1.Lajmi për atletet e Ramën
2.Lajmi për çizmet e Monikës
3.Lajm i munguar: lajmi për opingat e njerëzve”.
Por, përtej ironisë, ky mund të thuhet se ishte viti i Edi Ramës.
Ai arriti fitore të njëpasnjëshme politike përballë kundërshtarëve të vet.
Duke nisur nga reforma në drejtësi, të cilës i hapi rrugë pa asnjë kundërshti dhe duke ua lënë në dorë plotësisht ndërkombëtarëve.
Kjo i dha shumë pikë jo vetëm në Perëndim, por edhe në vend, gjë që u reflektua edhe në zgjedhjet e qershorit.
Fitorja më e madhe politike, që mund të quhet një art i vërtetë, ishte marrëveshja e majit me Lulzim Bashën.
Me atë marrëveshje, ai me një gur vrau dy zogj.
E para, arriti që të bindte opozitën të futej në zgjedhje, në një kohë që dukej se ajo ishte future në një rrugë pa kthim, për të bojkotuar zgjedhjet.
E dyta, ai e futi opozitën në zgjedhje të ndarë, pa koalicione, gjë që favorizonte në mënyrë të qartë Partinë Socialiste, e cila ka elektoratin më të madh në vend.
Duke shmangur një bashkim PD-LSI para zgjedhjeve, Rama arriti një fitore të pamenduar dhe të paaritur nga askush më parë.
Para kësaj fitoreje historike, ai arriti të nxirrte nga skena edhe Ilir Metën, duke e “futur me zor” në Presidencë, nga ku është i padëmshëm për të.
Me Berishën që e nxorri në pension në vitin 2013 dhe me Metën që e “burgosi” në Presidencë, tashmë Edi Rama ka mbetur vetëm përballë Lulzim Bashës, një kundërshtari që e “gënjen” me çikërima, siç ishte “qeveria e përkohshme”, dhe mund të qeverisë i qetë dhe madje, ka shanse të mëdha që të fitojë edhe zgjedhjet e adhshme parlamentare.
Kuptohet, derisa pa i plasur ndonjë skandal i madh apo çështje si ajo e Tahirit, që mund t’i trondisin qeverinë.
Ndryshe, as çizmja e Monikës e as “kërcënimet” e Bashës, s’mund t’ja prishin rehatinë e fitimtarit të madh politik të vitit që po lëmë pas.
