Një i ri ia ka dalë të mundë pandeminë që po trondit botën. Me valixhe në dorë, ai pret të lërë spitalin Infektiv dhe të kthehet në banesën e tij ku edhe do të karantinohet për 14 ditë të tjera.
Ndërsa menjëherë pas daljes së tij, ambulancat kanë sjellë në Infektiv dy të infektuar të tjerë, njëri në gjendje të rëndë, ndërsa tjetri në gjendje stabël.
Ndërkohë, në Shqipëri janë 186 të infektuar me Covid-19, mes tyre 4 fëmijë, ndërsa numri i viktimave ka shkuar në 10. 31 nga të prekurit janë shëruar, por harta e infektimit është zgjeruar.
Puka i bashkohet listës me 2 të infektuar, ndërsa epiqendra është në Tiranë me 107 të infektuar. 12 mjekë dhe infermierë janë prekur, ndërkohë që Spitali Infektiv, COVID1 po mbush kapacitetet me 77 shtretër. Autoritetet kanë vetëm një thirrje për qytetarët: Qëndroni brenda!
