Zëvendës Ministrja e Brendshme, Romina Kuko ka bërë thirrje qytetarëve në lidhje me lajmet e rreme që qarkullojnë këto kohë në rrjetet sociale dhe grupe komunikimi. “Referohuni për informacion vetëm në kanalet zyrtare. Faqet zyrtare të institucioneve të cilat përditësohen menjëherë”-shkruan Kuko.
Postimi i plotë:
Në mes të gjithë kësaj beteje ku çdonjëri prej nesh pa përjashtim duhet të bëjë sakrificën e vet, ekziston dhe një tufë gjallesash që duke përfituar nga kjo situatë, me papërgjegjshmëri totale shpërndajnë lloj e soj hatash fake nëpër grupe whatsappi, nëpër mesazhe “ekskluzive” me thirrjen për të marrë seriozisht alarmin e ngritur!
Teksa njerëz po humbasin jetën e të tjerë lëngojnë në shtratet e reanimacioneve, ajo që duhet të bëjmë është të zbatojmë rregullat e vendosura për të mirën e përgjithshme, për të shpëtuar sa më shumë nga ne, sidomos të dashurit tanë të moshuar që kanē tretur jetën e tyre për ne!
Sa i përket këtyre trakteve parazitare hedhur fshehtas nëpër llogore whatsappesh kini parasysh:
Referohuni për informacion vetëm në kanalet zyrtare. Faqet zyrtare të institucioneve të cilat përditësohen menjëherë!
Vendosni në pikëpyejtje burimin e informacionit kur merrni një mesazh a trakt alarmist (si ai gomarlleku i spërkatjes nga helikopteri) dhe verifikoni burimin. Nëse është anonim, mos e përcillni atë mesazh tek miqtë tuaj.
Referohuni tek mediat serioze dhe jo zgëqet e hapësirës virtuale!
Duke falenderuar së pari mjekët, policinë, Forcat e Armatosura, bashkitë, shërbimin social dhe prefektët, një falenderim me mirënjohje gazetarëve të terrenit të cilët me profesionalizëm dhe sens misioni po japin më të mirën e tyre.
Lërini gjallesat e papërgjegjshme të fake news pa ushqim. Nëse i injoroni, i sfidoni përfundimisht.
Forca miq! Të gjithë për një e një për të gjithë!
