Kryeministri Edi Rama ka përshëndetur marrëveshjen e sotme mes Prishtinës dhe Beogradit për linjën ajrore.
Përmes një mesazhi në “Twitter”, kreu i qeverisë shqiptare “thumbon” edhe kryeministrin në detyrë të Kosovës, Ramush Haradinaj, me të cilin është në proces gjyqësor, teksa thekson se bëri mirë që e përshëndeti këtë hap.
Më tej, Rama thekson se paqja është e vështirë, por në asnjë rast nuk fitohet me mjetet e luftës.
“E përshëndes me kënaqësi marrëveshjen e sotme për fluturimet Prishtinë-Beograd, që siç tha Sekretari i NATO-s është “një hap i rëndësishëm për qarkullimin më të lehtë të njerëzve e mallrave në Ballkanin Perëndimor”🙏Ka ende shumë hapa për të bërë me vizion e kurajo në atë rrugë!
Shumë mirë bëri edhe Ramushi që e përshëndeti këtë hap👍 Paqja është tejet e vështirë, por në asnjë rast ajo nuk fitohet me mjetet e luftës dhe popullariteti i përkohshëm që sjellin nganjëherë ato mjete, nuk i sjell asnjë hajër popullit e vendit👎”, shkruan Rama.
