Hidajete Salliu 72 vjeç, është viktima e dytë e aksidentit tragjik të ndodhur pasditen e sotme në rrugën “Xhanfize Keko”, në zonën e njohur si “Xhamlliku”.
72 vjeçarja Salliu dhe 36 vjeçari Erion Balla nga Mirdita u përplasën për vdekje teksa kalonin vijat e bardha, për të kaluar në anën tjetër të rrugës.
Dy viktimat ishin duke kaluar rrugën kur dy mjetet Golf dhe Volkswagen u përplasën me njëri-tjetrin si pasojë e shpejtësisë tej normave dhe parakalimit të gabuar të mjetit Volkswagen, dhe më pas morën përpara Hidajete Salliun e Erion Ballën, duke ju shkaktuar vdekjen e menjëhershme.
Bëhet me dije se edhe drejtuesi i njërit prej automjeteve të përfshira në aksident, Etjon Lazri është dërguar në spital pasi ka marrë lëndime nga përplasja, ndërsa për drejtuesin e mjetit tjetër Edmond Murati, nuk është raportuar për lëndime. Sipas policisë parakalimi i gabuar dhe shpejtësia kanë qenë shkaqet kryesore të aksidentit. Mësohet se njëra nga automjetet ka qenë në sensin e kundërt duke bërë një parakalim të gabuar.
