Tërmeti në Shqipëri shkaktoi vdekjen e rreth 50 personave, shembje dhe dëme në Durrës dhe një seri të gjatë tragjedish.
Midis këtyre, drama e një gruaje e gjetur e vdekur në shtrat, e përqafuar nga tre fëmijët e saj, dy binjakë vjeçar dhe një fëmijë 7 vjeç.
Ajo ishte gruaja e Berti Lala, 40 vjeç, i cili i mbijetoi rrënimit të shtëpisë por humbi tërë familjen, shkruajnë sot mediat italiane.
Përveç gruas dhe tre fëmijëve, burri ka humbur edhe një vajzë tjetër 8-vjeçare, një vëlla më të madh, një mbesë dhe nënën e tij 79-vjeçare.
I vetmi i mbijetuar nga tragjedia është edhe nipi tjetër i 40 vjeçarit, një 17 vjeçar i nxjerrë i gjallë nga rrënojat.
Mediat italiane shkruajnë se i riu “shpëtoi” nga një lavatriçe, e cila lëvizi nga vendi për shkak të tronditjeve nga shembja e shtëpisë, duke mos dhënë detaje të tjera.
Familja Lala jeton në zonën e ish-Kënetës në Durrës. Banesa e tyre është shembur plotësisht.
Kërkimet nën rrënoja zgjatën me ditë të tëra deri në mbrëmjen e kaluar, kur nëna me tre fëmijët u gjet e pajetë nën përqafimin e fëmijëve.
Ata gjetën vdekjen pasi u shtypën nga tavani i ndërtesës.
